Nagtalinaed iti red alert dagiti polis iti Metro Manila ken dua a kabangibang a rehion idinto nga immakar iti Liwasang Bonifacio iti Siudad ti Manila dagiti agrarali a pasurot ni Sen. Rodante Marcoleta
Indeklarar ni Manila Mayor Francisco Domagoso ti pannakasuspenso ti amin a klase kadagiti amin a pribado ken para iti publiko a pagadalan ita nga aldaw, Hulio 2, tapno masigurado ti kinatalged dagiti estudiante, mannursuro, ken empleado ti pagadalan.
Itay 8:00 iti agsapa, adda 400 a kameng ti Iglesia ni Cristo (INC) a simmangpet iti Liwasang Bonifacio, a kaaduanna ket naggapu iti Batangas 1st District.
Winaswas ti Quezon City government ti permit dagiti agrarali a kameng ti INC iti People Power Monument idi Hulio 1, gapu iti reklamo dagiti residente ken report a nakaro a pannakasinga iti lugar.
Segun iti Quezon City Department of Public Order and Safety (DPOS), linabsing dagiti agrarali ti tulag a nailanad iti permit gapu iti panangokuparda iti paset ti EDSA imbes nga agtalinaedda iti naaprubaran a rally site iti White Plains Avenue.
LPA iti laud ti Bataan, nagbalinen a Bagyo
Dinakamat ti DPOS dagiti report a nakaro a pannakasinga ti publiko a gapuanan ti kellaat a rali, idinto nga adu ti naladaw a nakastrek iti trabaho ken pagadalan.
Segun ken ni PNP chief Gen. Jose Melencio C. Nartatez, Jr., raemen ti PNP ti pangngeddeng ti gobierno ti Quezon City ken umdas dagiti imbaonda a buyot ti polis tapno mabantayan ti aktibidad ken masalakniban ti kalintegan dagiti motorista, agbibiahe, ken estudiante a maapektaran iti rali. (Aaron Recuenco/Manila Bulletin//Lito Hilidon/Bannawag)
