Posible nga agbalin a "super typhoon" ti bagyo nga adda iti 3,400 a kilometro iti daya ti pagilian sakbay a sumrek daytoy iti Philippine Area of Responsibility (PAR) inton umay a lawas, segun iti Philippine Atmospheric, Geophysical and Astronomical Services Administration (PAGASA) ita nga aldaw, Hulio 3.
Kinuna ni PAGASA weather specialist Obet Badrina nga agpalaud ti bagyo a managanan iti lokal a nagan nga "Inday" (internasional a nagan: "Bavi") apaman a sumrek iti PAR inton Martes (Hulio 7) wenno Mierkoles ( Hulio 8 ).
Impaganetget ni Badrina a saanda nga ekspektaren a direkta nga apektaran ti bagyo ti pagilian inton umay a lawas.
Kuna ni Badrina a mabalin a papigsaen ti nasao a bagyo ti abagat (southwest monsoon) inton umay a lawas, a mangyeg iti tudo iti Luzon ken Visayas manipud Mierkoles ( Hulio 8 ) agingga iti Biernes (Hulio 10).
Pattapattaen ti PAGASA nga agturong ti bagyo iti deppaar ti Taiwan ken mabalin a maipakat ti tropical cyclone wind signals iti ngudo ti Northern Luzon.
Signal 1, naibayog iti 12 a lugar iti Luzon gapu ken ni Bagyo Kiyapo
Inlawlawag ni Badrina nga adu pay ti mabalin a mapasamak iti bagyo, segun iti datosda, isu nga imbalakadna iti publiko a padaananda ti kaudian a damag maipapan iti bagyo. (Ellalyn De Vera-Ruiz/Manila Bulletin//Lito Hilidon/Bannawag)
