Umas-asideg ni Super Typhoon “Bavi” iti pagilian ket managanan iti “Inday” apaman a makastrek iti Philippine area of responsibility (PAR) inton rabii ti Martes (Hulio 7) wenno agsapa iti Mierkoles ( Hulio 8 ).
Ngem kinuna ti Philippine Atmospheric Geophysical and Astronomical Services Administration (PAGASA) a kimmapsut bassit ni Bavi bayat ti yaasideg daytoy iti pagilian.
Segun iti PAGASA, addan ti sentro ti Bavi iti 1,845 a kilometro iti daya ti Central Luzon iti kapardas a 20 a kilometro kada oras. Agpigsa ni Bavi iti 185 a kilometro kada oras ken pugso nga agingga iti 230 a kilometro kada oras.
Agtalinaed ni Bavi kas super typhoon bayat a sumrek daytoy iti PAR, idinto a maekspektar ti in-inut a panagkapuy ni Bavi kabayatan nga umasideg daytoy iti ngudo ti Northern Luzon.
Nupay pattapattaen ti PAGASA a saan nga agdisso ni Bavi iti daga, mabalin a maipan latta iti Signal Number 2 wenno 3 dagiti lugar iti amianan ken daya a paset ti Northern Luzon. (Aaron Recuenco/Manila Bulletin//Lito Hilidon/Bannawag)
