Saan a dimmar-ay ni Bise Presidente Sara Duterte iti umuna nga aldaw ti impeachment trial iti Senado idi Hulio 6, idinto nga impaganetget dagiti abogadona a kalinteganna a maibagian ti maysa nga abogado.
Segun ken ni panakangiwat ti depensa Michael Poa, pinili ni Duterte a dagiti abogadona ti mangibagi kenkuana iti impeachment trial, kas maitunos iti paglintegan ti Senado iti impeachment.
Ngem sakbay daytoy, pormal a nabotosan ni Senador Francis Escudero a kas presiding officer ti impeachment court ti Senado babaen ti botos ti 12 a senador.
Iti panagbitlana, kinuna ni Escudero a suroten ti impeachment court ti paglintegan a dua a katlo (2/3) ti amin a bilang dagiti senador (wenno 16 a senador) ti kasapulan tapno makombiktar ni Duterte.
Iti sabali a bangir, imbilin ti impeachment court ti Senado nga isubli iti BIR ti naselioan a kahon a naglaon iti tax record ni Duterte ken ti asawana a ni Manases Carpio, idinto a saanda pay nga inawat daytoy a kas ebidensia, ngem saan a maapektaran ti ania man a tignay ti impeachment court iti masakbayan. (Dhel Nazario/Manila Bulletin//Lito Hilidon/Bannawag)
