Nakastreken ni Super Typhoon Inday (internasional a nagan "Bavi") iti Philippine Area of Responsibility (PAR), segun iti Philippine Atmospheric, Geophysical and Astronomical Services Administration (PAGASA) ita nga aldaw, HUlio 8.
Nasaripatpatan ti PAGASA ni Bagyo Inday iti 1,405 a kilometro iti daya ti Northern Luzon ken agpalaud iti kapardas a 25 a kilometro kada oras.
Agpigsa ni Inday iti 185 a kilometro kada oras iti asideg ti sentrona, ken pugso nga agingga iti 230 a kilometro kada oras.
Naipan iti Tropical Cyclone Wind Signal (TWCS) No. 1 iti Batanes, Cagayan agraman ti Babuyan Islands, ti amianan ken sentro a paset ti Isabela (Santo Tomas, Aurora, Santa Maria, Quezon, San Mariano, Naguilian, Dinapigue, Roxas, Luna, Delfin Albano, City of Cauayan, San Pablo, Ilagan City, Benito Soliven, Tumauini, Cabagan, Reina Mercedes, San Manuel, Palanan, Cabatuan, Quirino, Divilacan, Gamu, Mallig, Maconacon, Burgos, San Guillermo, Angadanan, Alicia, San Mateo), Apayao, ti daya a paset ti Kalinga (Pinukpuk, City of Tabuk, Rizal), ti amianan a paset ti Aurora (Dilasag), ken ti amianan ken sentro a paset ti Catanduanes (Pandan, Caramoran, Bagamanoc, Panganiban, Viga, Gigmoto, Baras, San Miguel).
Iti sabali a bangir, ti abagat (southwest monsoon) ken ti aglawlaw ni Bagyo Inday ti mangyeg iti napigsa nga angin iti Pangasinan, Zambales, Bataan, CALABARZON, MIMAROPA, Bicol Region, dadduma a paset ti Visayas, ken ti dakkel a paset ti Mindanao.
Signal 1, naibayog iti 12 a lugar iti Luzon gapu ken ni Bagyo Kiyapo
Ekspektaren ti PAGASA a kumapuy ni Inday ket agbalin a typhoon category mangrugi no Huebes, Hulio 9, sa rummuar iti PAR inton Sabado (Hulio 11). (Ma. Cristina Arayata/PNA//Lito Hilidon/Bannawag)
