Kimmapsut, ket maysa laengen a gagangay a bagyo ni Typhoon Inday (internasional a nagan: Bavi), segun iti Philippine Atmospheric, Geophysical and Astronomical Services Administration (PAGASA) ita nga aldaw, Hulio 9.
Agpigsa ni Bagyo Inday iti 175 a kilometro kada oras iti asideg ti sentrona, ken pugso nga agingga iti 215 a kilometro kada oras.
Itay 4:00 iti parbangon, nasaripatpatan ti PAGASA ni Bagyo Inday iti 925 a kilometro iti daya ti Northern Luzon, nga agpalaud-amianan a laud iti kapardas a 20 a kilometro kada oras.
Iti laksid ti panagkapsut ti bagyo, nagtalinaed iti Signal No. 1 ti Batanes, Cagayan agraman ti Babuyan Islands, Isabela, ti amianan a daya a paset ti Quirino (Maddela), Apayao, ti amianan a paset ti Abra (Tineg, Lagayan, Danglas, San Juan, Lagangilang, Licuan-Baay, Malibcong, Lacub, Daguioman, Dolores, La Paz), Kalinga, ti daya a paset ti Mountain Province (Natonin, Paracelis), ti daya a paset ti Ifugao (Aguinaldo, Alfonso Lista), Ilocos Norte, ti amianan a paset ti Aurora (Dilasag, Casiguran), ken ti amianan ken sentro a paset ti Catanduanes (Pandan, Caramoran, Bagamanoc, Panganiban, Viga, Gigmoto, Baras, San Miguel).
Innayon ti PAGASA nga agtultuloy a kumapsut ni Inday, ngem agtalinaed a kas bagyo agingga a rummuar iti pagilian inton Sabado (Hulio 11). (Aaron Recuenco/Manila Bulletin//Lito Hilidon/Bannawag)
