Ad-adda pay a kimmapsut ni Bagyo Inday (internasional a nagan: Bavi) ket agpigsa laengen iti 150 a kilometro kada oras ken pugso nga agingga iti 185 a kilometro kada oras, kuna ti Philippine Atmospheric, Geophysical and Astronomical Services Administration (PAGASA) ita nga aldaw, Hulio 10.
Itay 4:00 iti parbangon, nasaripatpatan ti PAGASA ti bagyo nga adda iti 620 a kilometro iti daya ti Basco, Batanes, ken agpaamianan a laud iti kapardas a 20 a kilometro kada oras.
Adda iti Signal No. 2 ti Batanes, ti daya a paset ti Babuyan Islands (Babuyan Is., Didicas Is., Camiguin Is.) ken iti amianan a daya a paset ti kadaklan ti Cagayan (Santa Ana).
Signal No. 1 iti dadduma a paset ti Babuyan Island, ti dadduma a paset ti kadaklan ti Cagayan, Isabela, Apayao, ti amianan a paset ti Abra (Tineg, Lagayan, Danglas, San Juan, Lagangilang, Licuan-Baay, Malibcong, Lacub, Daguioman, Dolores, La Paz), Kalinga, ti daya a paset ti Mountain Province (Natonin, Paracelis), ti daya a paset ti Ifugao (Aguinaldo, Alfonso Lista), ken Ilocos Norte.
Pattapattaen ti PAGASA a rummuar ni Inday iti pagilian inton Sabado (Hulio 11).
Signal 1, naibayog iti 12 a lugar iti Luzon gapu ken ni Bagyo Kiyapo
Iti sabali a bangir, ti abagat ti mangyeg iti napigsa a tudo iti Occidental Mindoro ken Antique, Zambales, Bataan, Metro Manila, Rizal, Cavite, Laguna, Batangas, Oriental Mindoro, Romblon, Palawan, Aklan, Capiz, Iloilo, Guimaras, Negros Occidental, Negros Oriental, Zamboanga del Sur, Lanao del Norte, ken Lanao del Sur. (Ma. Cristina Arayata/PNA//Lito Hilidon/Bannawag)
