Malagipyo pay ni Jee Ick Joo? Wen, isuna ti Koreano nga ehekutibo (taga-South Korea) a napapatay iti uneg a mismo ti Philippine National Police headquarters iti Camp Crame iti Quezon City kalpasan a kinidnap dagiti managdakdakes a polis babaen ti panangiwayatda iti anti-illegal drugs operation.
Nagbalin ti ipapatayna a simbolo ti dagiti panagabuso a naaramid kabayatan ti drug war ti adminitrasion a Duterte.
Segun ken ni hepe ti PNP Gen. Jose Melencio C. Nartatez Jr., maibangon ti memorial marker iti mismo a nakabekkelan ni Jee agingga a natay iti uneg ti Camp Crame kas mataginayon a palagip iti panagkumit ti PNP iti institutional integrity.
“Yanninaw ti memorial ti kinatulok ti organisasion a mangsango iti napalabasna bayat a papigsaenna dagiti reporma a mangitandudo iti panagsungbat ken propesionalismo,” kinuna ni Nartatez.
Signal 1, naibayog iti 12 a lugar iti Luzon gapu ken ni Bagyo Kiyapo
"Daytoy a pakalaglagipan ket napasnek a panangbigbig iti nakalkaldaang a paset ti pakasaritaan ti institusiontayo. Ditay' mabalin a baliwan ti napalabas, ngem mabalintayo a padayawan ti biktima, itandudo ti panagsungbat, ken pasingkedan manen ti panagkumittayo a saanton a pulos a mapalubosan ti kasta a panangabuso iti autoridad," innayonna.
Indatag ni Nartatez ti naisingasing a memorial parker iti balo ni Jee a ni Choi Kyung Jin, bayat ti nabiit pay a panagbisita daytoy a kaduana ni South Korean Ambassador Lee Sang-hwa iti Camp Crame idi Mierkoles, Hulio 8.
Naisayangkat ti pannakapadayaw ti biktima dandani maysa a dekada kalpasan nga innala dagiti managdakdakes nga opisial ti polisia ni Jee iti uneg ti Camp Crame idi Oktubre 2016 sa idi agangay ket pinapatayda daytoy. Ti kadaksan a napasamak, nagkiddaw pay laeng dagiti nagkidnap a polis iti ransom a kuarta kalpasan a pinapataydan ni Jee ken pinuoranda ti bangkayna.
Bayat ti imbestigasion, sumagmamano a saksi ti timmulong kadagiti imbestigador ket nangitunda iti pannakabigbig iti teniente koronel ti polis idi a ni Rafael Dumlao, a nakadestino idi iti anti-illegal drugs unit ti PNP.
Naarestar ni Dumlao idi napan a bulan kalpasan nga imbabawi ti nangato a korte ti pannakabsuelto nga inkeddeng ti maysa a lokal a korte.
Binigbig pay ni Nartatez ti panagyaman ti balo iti liderato ti PNP kalpasan ti pannakaarestar ni Dumlao, a kuna daytoy a nangyeg iti napabaro a panagtalek ti pamilia iti hustisia.
“Magun-od ti panagtalek babaen ti accountability, transparency, ken agtultuloy a reporma,” kinuna ni Nartatez.
“Ngem saan a mapunas daytoy a pakalaglagipan ti saem a pinarnuay ti krimen, isimbolona ti kinatuloktayo a manglagip, makasursuro kadagiti bidduttayo, ken agtultuloy a mangpapigsa iti institusion tapno dakdakkel ti panagtalek ti publiko iti Philippine National Police,” impaganetgetna. (Aaron Recuenco/MANILA BULLETIN)
