Simrek ni Bagyo Josie iti Philippine Area of Responsibility (PAR) ita nga aldaw, Hulio 14, ngem rummuar met laeng iti karabianna, wenno inton Mierkoles (Hulio 15) ti agsapa, segun iti Philippine Atmospheric, Geophysical and Astronomical Services Administration (PAGASA).
Maibasar iti datos ti PAGASA, adda ni Bagyo Josie (internasional a nagan: Haishen) iti 1,085 a kilometro iti daya ti Eastern Visayas itay 4:00 iti parbangon, ket agpaamianan a laud iti kapardas a 25 a kilometro kada oras.
Agpigsa ni Josie iti 65 a kilometro kada oras iti asideg ti sentrona, ken pugso nga agingga iti 80 a kilometro kada oras.
Innayon ti PAGASA a saan a direkta a makaapektar ni Josie iti kasasaad ti panawen iti pagilian, ngem papigsaenna ti abagat (southwest monsoon) a mangyeg iti pul-oy kadagiti lugar nga asideg iti baybay. (Ellalyn De Vera-Ruiz/Manila Bulletin//Lito Hilidon/Bannawag)
