Dinutokan ni Presidente Marcos Jr. ni hepe ti Philippine Orthopedic Center (POC) Medical Center Dr. Jose Brittanio Pujalte Jr. a kas baro a sekretario ti Department of Health (DOH), kalpasan a naglusulos ni Dr. Teodoro Herbosa gapu iti parikut iti salun-at daytoy.
Iti naangay a press briefing, kinuna ni undersecretary ti Presidential Communications Office (PCO) Claire Castro a naglusulos ni Herbosa gapu ta kasapulanna ti knee replacement surgery nga agpaut iti uppat a bulan sakbay a maimbagan.
Maysa nga orthopedic surgeon ni Pujalte a nagturpos iti medisina iti University of the Philippines-Philippine General Hospital (UP-PGH) idi 1990, sakbay a simrek iti Philippine Orthopedic Center kas orthopedic resident idi 1994.
Nagpaay ni Pujalte a Medical Center Chief ti Philippine Orthopedic Center (POC) sipud idi Hulio 14, 2014, a nangimaton iti kangrunaan nga specialty hospital para iti orthopedics ken rehabilitation medicine iti pagilian.
Idi 2022, inyendorso ti grupo a Philippine Orthopedic Association ni Pujalte a kas sekretario ti DOH idinto a talkenda ti kabaelan ni Pujalte a mangiwardas iti sistema ti salun-at ti pagilian, iti sidong ti dakkel a parikut ti sektor ti salun-at, ket patienda a dakkel ti maitulong daytoy iti administrasion ni Marcos. (Argyll Cyrus Geducos/Manila Bulletin//Lito Hilidon/Bannawag)
