Kas paset ti panangpaliiw ti LGU Santa iti National Disaster Resilience Month 2026, inrusat ti Municipal Disaster Risk Reduction and Management Office (MDRRMO) ti "SANTALENTADO 2026: Beat the Risk," maysa a pasalip para kadagiti agtutubo iti panagputar iti jingle.
Gagem daytoy a gannuat ti panangipaganetget kadagiti agtutubo ti panangasada iti talentoda iti musika para iti pannakaitandudo ti kinapateg ti makapagsagana ken partisipasion ti komunidad kadagiti sumangbay a natural a didigra kas iti bagyo.
Mayannurot ti kompetision itoy a tawen iti nasional a tema a: "Naghahanda at Kumikilos Tungo sa Panatag na Bagong Pilipinas."
Dagiti alagaden iti pasalip:Silulukat ti pasalip kadagiti amin nga agad-adal kadagiti publiko ken pribado a pagadalan iti Junior High School (JHS) ken Senior High School (SHS) iti Munisialidad ti Santa. Mangbukel dagiti pagadalan a makipartisipar iti grupo a mang-compose iti orihinal a kanta a mangispirar iti panangipaganetget iti kinapateg ti kanayon a nakasagana ken agtalinaed a natibker.
Dagiti premio ken insentibo:
Pannakatarimaan dagiti proyekto a dinadael ti bagyo, pinadaras ti LGU Santa
•Grand Champion: ₱5,000, ken Plaque of Recognition, ken sertipiko para iti prinsipal ti eskuela, ken iti coach/adviser.
•Consolation Prize: Dagiti makipartisipar a pagadalan, a mapagasatan, maipaayan iti ₱2,500 a premio ken sertipiko iti pannakipartisipar.
Masapul a maidatag dagiti entries iti saan a naladladaw ngem Hulio 28, 2026.
Mainaig itoy, kalikaguman ni Mayor JJ Bueno III ken ti MDRRMO a makipartisipar dagiti amin a pagadalan ken isalipda dagiti kalaingan ken talentado nga estudianteda tapno aramatenda ti bileg ti musika a mangisiguro iti nataltalged, pro-active, ken tapno agbalin ti Santa nga agnanayon a nakasagana iti didigra. (MARILYN CORRALES CONTILLO)
