Kabaelan ni Bise Presidente Sara Duterte ti mangibanag iti pangta a panangpapatay gapu ta amana ni dati a presidente Rodrigo Duterte a naidarum iti International Criminal Court (ICC) gapu kadagiti maipagarup nga extrajudicial killing (EJK) a napasamak iti drug war nga insayangkat idi ti administrasionna.
Daytoy ti kinuna ni National Bureau of Investigation (NBI) Regional Director Jeremy Lotoc a makagapu a saanda latta a nalaka a mailaksid dagiti pangta nga insawang ti bise presidente iti inangayna nga online press conference idi Nobiembre 2024.
Dinakamat daytoy ni Lotoc idi sinaludsod ni Senate President Sherwin Gatchalian no ania ti nadagsen nga ebidensia ti NBI Cybercrime Division tapno patienda a kabaelan ni VP Duterte ti mangontrata iti tao a mangpapatay kada Presidente Ferdinand “Bongbong” Marcos Jr., First Lady Liza Araneta-Marcos, ken dati a House Speaker Martin Romualdez, no bilang adda mapasamak iti bise presidente.
Segun ken ni Lotoc, nupay inlibak ni VP Duterte a pinangtaanna ti First Family, naipasdekdan dagiti elemento ti krimen a grave threat, idinto a saan nga umdas ti panangilibak ti bise presidente.
Kinuna ni Lotoc a daytoy ti gapuna a kayatda a personal a kasarita ni VP Duterte tapno maimtuodda a naimbag no pudno nga addan nakasaritana a mammapatay, ngem saan met a nakikooperasion ti bise presidente iti panagimbestigar ti NBI.
Video ti China Daily, kinondenar ti DFA
Inlawlawag ni Lotoc a kabaelan ni VP Duterte nga aramiden ti pangtana ta, umuna iti amin, isu ti bise presidente ti Filipinas, ken maikadua, gapu ta amana ni dati a presidente Duterte a naidarum iti ICC gapu kadagiti kaso ti EJK. (Hannah L. Torregoza/Manila Bulletin//Lito Hilidon/Bannawag)
