Imbilin ti Sandiganbayan a maisubli ni Senador Rodante Marcoleta iti Male Dormitory ti New Quezon City Jail ita nga aldaw, Hulio 15, kalpasan a matakuatan a saanen a kasapulan a mayospital daytoy.

Impaulog ti Third Division ti Sandiganbayan ti pammilin kalpasan ti panangtingiting ti University of the Philippines-Philippine General Hospital (UP-PGH) ken ti Philippine National Police (PNP) General Hospital, nga agpada a nagkuna a kabaelan ni Marcoleta ti agbiahe.

Naiwayat ti agwaywayas a panangsukimat iti kasasaad ti salun-at ni Marcoleta kalpasan a binilin ti korte ti UP-PGH idi Hulio 10 a sukimatenda ti senador.

Segun ken ni UP-PGH Director Dr. Gerardo Legaspi, lima a senior consultant ti Department of Internal Medicine ti UP-PGH ti nangsukimat ken ni Marcoleta ken nangrepaso iti medical record daytoy iti PNP General Hospital.

Natakuatan dagiti lima a consultant a komportable ti senador, kabaelanna ti aggaraw a bukodna, ken normal ti amin a vital signs-na, idinto nga awan ti nakitada a pagilasinan ti pneumonia, ken normal ti resulta ti electrocardiogram ken laboratory test.

Nasional

Lotoc: Kabaelan ni VP Duterte ti mangkontrata iti mammapatay

Kinuna ni Legaspi nga awan ti nakitada a pangta iti salun-at ni Marcoleta ken awan pakasapulan nga agtalilnaed daytoy iti ospital.

Gapu iti daytoy, imbilin ti korte a maipan iti Quezon City Jail Male Dormitory ni Marcoleta, a naidarum iti plunder.

Impasigurado ti superintendent ti Quezon City Jail Male Dormitory iti Sandiganbayan a kabaelanda a tamingen ti pannakaipaay iti agas, bantayan ti vital signs, ken yakar  iti kaasitgan nga ospital ni Marcoleta no kasapulan. (Ellalyn De Vera-Ruiz/Manila Bulletin//Lito Hilidon/Bannawag)