Immanamong da Presidente Marcos Jr. ken Prime Minister Lawrence Wong a patibkerenda ti panagtinnulong ti Filipinas ken Singapore iti negosio, artificial intelligence (AI), panagpuonan, panangtagiben iti salun-at, ken pannakapadur-as ti gimong kabayatan a pasaknapenda ti singgalut iti ekonomia ken panangtaming iti tumpuar nga oportunidad iti digital nga ekonomia.
Kalpasan ti panagsaritada iti Istana iti Singapore idi Hulio 15, kinuna ni Marcos a naiturong ti saritaan iti panangpalawa iti panagtinnulong kadagiti kangrunaan a sektor ti panagdur-as bayat a sukimaten dagiti wagas tapno naan-anay a mapagnumaran ti AI ken maallukoy ti ad-adu a pamastrekan iti pagilian.
Impaganetget ni Marcos ti pateg ti agtultuloy a panagtinnulong ti dua a pagilian iti panangitandudo iti talna, kinatalged, ken panagdur-as ti rehion.
Paset daytoy ti isasarungkar ni Marcos iti Singapore manipud Hulio 14 agingga 16, idinto a kinasaritana dagiti opisial ti gobierno ken business executive sadiay tapno maan-anay ti panagtinnulong iti ekonomia, mangallukoy kadagiti agpuonan, ken maitandudo ti Filipinas kas lugar a napintas para iti panagnegosio. (Argyll Cyrus Geducos/Manila Bulletin//Lito Hilidon/Bannawag)
