Kinondenar ti Department of Foreign Affairs (DFA) iti China Daily gapu iti panangipablaakda iti AI-generated video ken cartoon a mangiparparang a kas bakes dagiti Filipino mainaig iti 2016 South China Sea Arbitral Award.
Iti maysa nga statement ti DFA idi Hulio 16, kunada a saanen a nainkalintegan a debate iti politika ti impablaak ti pagiwarnak ti gobierno ti China, agraman ti impablaakda idi Hulio 10, gapu ta nalawag a panangipababa, pananglais, ken panangidumduma kadagiti Filipino ti inaramidda.
Impakdaar ti DFA a dagiti kastoy a kita ti panangiladawan, ken ti maiwaras a palso nga impormasion, ti ad-adda a mangpabassit iti panagtalek iti baet ti China ken Filipinas, ket rumbeng laeng a maikkat iti kabiitan a panawen.
Iti sabali a bangir, sinupiat ni Department of National Defense (DND) Secretary Gilbert Teodoro Jr. ti nasao a video, ket kinunana a babaen ti video nga impablaak ti China Daily, ipakpakita ti China no ania ti panangmatmatda kadagiti Filipino ken mangiparangang iti kinaawan ti moral ken saririt ti propaganda nga iwarwaras ti China. (Argyll Cyrus Geducos/Manila Bulletin//Lito Hilidon/Bannawag)
