Sisasagana ni Department of Public Works and Highways (DPWH) Secretary Vince Dizon a makikooperar iti ania man a maiwayat nga imbestigasion mainaig iti maipagarup nga anomalia iti pannakaipatakder dagiti pasdek ti New Clark City iti Tarlac a nakaangayan ti 2019 Southeast Asian Games.
Ni Dizon ti daulo ti BCDA idi, a maysa kadagiti ahensia a nangiwardas iti pannakaipatakder dagiti nasao a pasilidad.
Ni Senador Alan Cayetano ti chairman idi ti Philippine Southeast Asian Games Organizing Committee (PHISGOC), ti ahensia a nangimaton iti pannakasangaili ti SEA Games idi 2019.
Rimmuar dagiti maipagarup nga irregularidad, a pakairamanan ti nasurok a ₱50 a milion ti balorna a cauldron (kaldero) a nausar iti opening ceremony ti SEA Games.
Nupay kasta, kinuna ni Dizon nga awan ti nasken nga ilemmengna, idinto maysa isuna kadagiti inimbestigaran ken inabsuelto ti Ombudsman idi Disiembre 2021 -- banag a pinatalgedan ti Office of the Ombudsman. (Aaron Recuenco/Manila Bulletin//Lito Hilidon/Bannawag)
