Agtultuloy latta ti panagimbestigar ti Office of the Ombudsman (OMB) iti mapapati a naanomalia a flood control project a nakairamanan dagiti senador a da Francis “Chiz” Escudero ken Joel Villanueva.
Iti kallabes, nangpataud ti panagbalbaliw iti panagkakadua iti Senado iti pattapatta a saanen a maidarum da Escudero ken Villanueva gapu ta nakikapponda iti mayoria ti Senado nga idadauluan ni Sen. Sherwin Gatchalian.
Ngem segun ken ni Ombudsman Jesus Crispin “Boying” Remulla, agtultuloy ti panagimbestigarda ken isagsaganadan ti kaso a maipila kontra kada Escudero ken Villanueva.
Idi Hunio 29, kinuna ni Remulla nga idatag ti OMB ti kaso ni Escudero iti Sandiganbayan iti las-ud ti dua wenno tallo a lawas.
Inlawlawag ni Remulla nga agingga ita, adda latta iti umuna a paset ti panagimbestigar ti kaso ni Escudero gapu ta masapul a tingitingenda a naimbag dagiti ebidensia ken impormasion, ngem dandanin malpas daytoy. (Jel Santos/Manila Bulletin//Lito Hilidon/Bannawag)
