Pinatgan ti impeachment court ti Senado ti kiddaw ti prosekusion ti Kamara a maikkan iti subpoena dagiti rekord iti banko, report ti Anti-Money Laundering Council (AMLC), ken tax document ni Bise Presidente Sara Duterte; kasta met ni Manases Carpio a kaingungotna, ken ti sumagmamano a kompania nga adda pakainaiganna.
Iti pangngeddeng ni presiding officer Senador Francis "Chiz" Escudero idi Hulio 20, kinunana a napateg dagiti dokumento a kidkiddawen ti prosekusion maipanggep iti Article II ti Articles of Impeachment a maipanggep iti mapapati a saan a mailawlawag a kinabaknang.
Maikkan iti subpoena dagiti nadumaduma a banko ken AMLC report mainaig kada Duterte ken Carpio, ti personal ken ti joint account-da, dagiti partner ti Carpio Lawyers, ken ti 19 a korporasion nga addaan pakainaigan da Duterte, agraman ti statements of assets, liabilities and net worth (SALN) ti bise presidente.
Nupay kasta, agpatingga laeng iti peso account ti banko ti pinalubosanda a maikkan iti subpoena, gapu ta iparit ti Foreign Currency Deposit Act (RA 6426) ti pannakaibutaktak dagiti ganggannaet a kuarta iti banko.
Maikkan iti subpoena ti tax record ni Duterte manipud iti Bureau of Internal Revenue (BIR).
Maika-5 a SONA, idatag ni Marcos ita nga aldaw
Saan nga impalubos ti Impeachment Court ti kiddaw a ma-subpoena dagiti dokumento ti JTC Group of Companies Philippines, Inc. ken ti Pikimong Pikimong Philippines Corporation, gapu ta saan napaneknekan ti prosekusion nga adda pakainaigan da Duterte ken Manases kadagitoy a kompania.
Binilin ti impeachment court ti BIR, AMLC, ken dagiti maseknan a banko nga isubmiterda dagiti nakiddaw a dokumento inton Hulio 30. (Dhel Nazario/Manila Bulletin//Lito Hilidon/Bannawag)
