Nagbalinen a bagyo ti low-pressure area (LPA) iti abagatan a daya ti Luzon, ket napanaganan daytoy iti “Kiyapo,” segun iti Atmospheric, Geophysical and Astronomical Services Administration (PAGASA) ita nga aldaw, Hulio 23.
Maibasar iti kaudian a waragawag ti PAGASA itay 5:00 iti parbangon, adda pigsa ni Bagyo Kiyapo a 45 a kilometro kada oras iti asideg ti sentrona, ken pugso nga agingga iti 55 a kilometro kada oras.
Nasaripatpatan ti PAGASA ni Bagyo Kiyapo iti 950 a kilometro iti daya ti Central Luzon, ken agpalaud-amianan a laud iti kapardas a 20 a kilometro kada oras.
Naibayog ti Tropical Cyclone Wind Signal No. 1 iti Batanes, Cagayan agraman ti Babuyan Islands, Isabela, Apayao, Abra, Kalinga, ti daya ken sentro a paset ti Mountain Province Paracelis, Natonin, Barlig, Sadanga, Bontoc, Besao, Sagada), ti daya ken sentro a paset ti Ifugao (Mayoyao, Aguinaldo, Alfonso Lista, Banaue, Hingyon, Lagawe), Ilocos Norte, ti amianan a paset ti Ilocos Sur (Cabugao, Sinait, San Juan, Magsingal, Santo Domingo, Bantay, San Ildefonso, San Vicente), ken ti amianan a paset ti Aurora (Dilasag, Casiguran).
Segun iti PAGASA, mabalin pay a ngumato agingga iti maikatlo a pagsenialan (Signal No. 3 ) no pumigsa ni Kiyapo bayat ti ilalabasna iti deppaar ti Batanes ken Babuyan Islands. (Ellalyn De Vera-Ruiz/Manila Bulletin//Lito Hilidon/Bannawag)
