Sarita ni ABRAHAM PASION
TIMMAKDER tapno keltayenna ti irurusing ti managbasol a rikna iti barukongna. Agawiden tapno mailisi iti dakes a panagem.
Nagsikko a nagpaabagatan iti sanguanan ti kapitolio.
Tinarengtengna ti kamino real agingga iti batog ti tiendaan. Nagsikko manen iti kanawan ket sinurotna ti nailet a kalsada a nangbeltak iti tiendaan ken dagiti babassit a pagtagilakuan iti amiananna. No iti bigbigat, saan a kalsada daytoy ta dappatan dagiti aglaklako iti nateng, bunga, ken pusi. No iti la ngaruden Domingo, madakamat payen a pagtagilakuan kadagiti baratilio a lupot ken dadduma pay nga alikamen. Ngem no iti malemen a kas ita, nawada man met laengen ket agbalin a kalsada.
Sumirsirayaten ti init idi makadanon iti balayda. Nabannog unay iti panagriknana iti bagina. Kalpasan ti pananguksobna kadagiti aruatenna, impusotna ti bagina iti kakaisuna a butaka iti suli ti beranda. Ditoy ti nakareggaayan dagiti agdadarison a lagip iti panunotna agingga iti limmamiis ti dapadap ti panawen ket nangin-inut a nagparang dagiti bituen a nangipasimudaag iti isasangbayen ti nainggasatan a rabii.
KLASIKO A SARITA: Hospital (2)
Iti aglawlaw, rimsua ti ariwawa dagiti ubbing nga aglalaaw kadagiti paraangan. Agkarabanangbang a rebentador, agsisinnungbat a kankanta ken rayray-aw. Iti plasa, madaman ti salip iti rondalia, ket iti saan unay a mabayag kalpasan ti panangikeddeng ti hunta no asino dagiti nangabak iti salip, agturongton dagiti tattao iti simbaan tapno idatonda dagiti napasnek a kararagda… ken panagyamanda a sumarabo iti naindaklan a damag iti sangalubongan.
Manipud iti apagbingngi a tawa, intungraraw ni Fidel ti rupana. Dagus nga immapras ti nasalemsem a pul-oy ket manipud iti rupana, gimmayamat ti lamiis a simmuknor kadagiti tulangna. Nagtayegteg. Ngem inirutanna ti panagdalikepkepna ket nariknana ti apagapaman a bara a pinarnuay ti ikekepkep ti badona. Tinangadna ti langit. Awan ti bulan ngem narnuoyan iti bituen. Timmaliaw iti amianan a daya.
Adda nasirayanna a naraniag a paset ket ammona a dayta ti batog ti Plasa Burgos a pakaar-aramidan dagiti nadumaduma a pabuya ken salip. Iti amiananna, isu met ti batog ti katedral ti Vigan, ti simbaan a nangisagsagutanna iti panagserbina iti unos ti duapulo ket tallo a tawen. No kas koma pay iti napalabas, adda koma ita idiay a mangipangulo kadagiti sangapulo a biolinista, agraman ni Rico, iti babaen ti baton ni Mr. Refani.
Ammona nga iti dayta a kanito, addadan idiay… ti koro ken ti soloista— ni Lety a kinaubingan ken inar-arapaapna a makaasmangnanto a mangitukit kadagiti bukel ti masakbayanna.
Addadan idiay tapno iti umuna a gundaway, agabayton da Lety ken Rico, kas soloista ken umuna a biolinista ti koro, iti sanguanan dagiti sangapulo biolinista a mangdangdanggay kadakuada iti likud. Nalabit a sumsumga met itan dagiti kabbalayna a mangur-uray iti isasangpetna iti simbaan. “Umunakayon,” kinunana itay ken ni nanangna. “Sumarunoakto.”
Ngem saanen a mapan. Awanen ti kaimudinganna iti koro ket saannan a kayat a nayonan pay ti sabidong ti sisusugaten a riknana.
(Maituloyto)
