Nagbalinen a tropical storm ni Bagyo Kiyapo ket naikkan iti internasional a nagan a “Noul,” segun iti Philippine Atmospheric, Geophysical and Astronomical Services Administration (PAGASA) ita nga aldaw, Hulio 24.
Nasaripatpatan ti PAGASA ni Bagyo Kiyapo iti 820 a kilometro iti daya ti Northern Luzon, nga agpigsa iti 65 a kilometro kada oras ken pugso nga agingga iti 80 a kilometro kada oras.
Agpalaud-amianan a laud ni Kiyapo iti kapardas a 30 kilometro kada oras.
Itay 5:00 iti parbangon, naibayog ti Tropical Cyclone Wind Signal (TCWS) No. 2 iti Batanes, ti amianan a paset ti Cagayan (Santa Ana, Gonzaga, Santa Teresita, Buguey, Camalaniugan, Aparri, Ballesteros, Abulug, Pamplona, Sanchez-Mira, Claveria, Santa Praxedes) agraman ti Babuyan Islands, ken ti amianan a paset ti Ilocos Norte (Pagudpud).
Naibayog ti TCWS No.1 iti dadduma a paset ti Cagayan, Isabela, Nueva Vizcaya, Quirino, Apayao, Abra, Kalinga, Mountain Province, Ifugao, Benguet, ti dadduma a paset ti Ilocos Norte, Ilocos Sur, La Union, ken ti amianan ken sentro a paset ti Aurora (Dilasag, Casiguran, Dinalungan, Dipaculao).
Signal 1, naibayog iti 12 a lugar iti Luzon gapu ken ni Bagyo Kiyapo
Segun iti PAGASA, pumigsa pay ni Bagyo Kiyapo bayat a tuparenna ti Northern Luzon ken agbalin a severe tropical storm no makalabas iti Babuyan Islands.
Ekspektaren ti PAGASA a rummuaren ni Kiyapo iti Philippine Area of Responsibility inton Sabado (Hulio 25) ti agsapa. (Ellalyn De Vera-Ruiz/Manila Bulletin//Lito Hilidon/Bannawag)
