Nupay rimmuaren iti Philippine Area of Responsibility (PAR), agtalinaed a nakabayog iti Tropical Cyclone Wind Signal (TCWS) No. 1 ti sumagmamano a paset ti Northern Luzon bayat a pimmigsa ni Bagyo Kiyapo (internasional a nagan: Noul), segun iti Philippine Atmospheric, Geophysical and Astronomical Services Administration (PAGASA) ita nga aldaw, Hulio 25.
Itay 5:00 iti parbangon, nasaripatpatan ti PAGASA ni Kiyapo iti 320 a kilometro iti laud ti Basco, Batanes, nga agpigsa iti 120 a kilometro kada oras iti asideg ti sentrona ken pugso nga agingga iti 150 a kilometro kada oras.
Agpalaud-amianan a laud ni Kiyapo iti kapardas a 25 a kilometro kada oras.
Naibayog ti TCWS No. 1 iti Batanes, iti laud a paset ti Babuyan Islands (Calayan Island, Dalupiri Island, ken Fuga Island), ti amianan a laud a paset ti kadaklan a Cagayan (Pamplona, Sanchez-Mira, Claveria, ken Santa Praxedes), ti amianan a paset ti Apayao (Luna ken Calanasan), ken Ilocos Norte.
Ekspektaren ti PAGASA nga agtultuloy ni Kiyapo nga agpaamianan a laud agingga inton Domingo nga agturong iti kadaklan a daga ti China. (Jose Cielito Reganit/PNA//Lito Hilidon/Bannawag)
