Bimtak ti maysa nga improvised bomb iti asideg ti main entrance ti pasdek ti Department of Justice (DOJ) sumagmamano nga oras sakbay a maangay ti maikalima nga State of the Nation Address (SONA) ni Presidente Marcos Jr.; idinto nga adda met bomba a nasarakan iti Diokno Boulevard a yan ti Senado, segun iti DOJ.
Iti maysa nga statement ti DOJ ita nga aldaw, Hulio 27, kinunada nga adda bimtak a bomba itay 12:17 iti tengnga ti rabii (Hulio 27) iti asideg ti pagserkan ti opisinada iti Padre Faura iti Ermita, Manila.
Segun iti DOJ, awan ti nadangran wenno natay iti dayta a pasamak, idinto a nagresponde a dagus ti Philippine National Police Explosive Ordinance Disposal (PNP-EOD) Unit, ket im-imbestigarandan ti naggapuan, kababalin, ken dagiti dadduma pay a banag a nangitunda iti panagbettak.
Innayon ti DOJ a kontroladodan ti situasion, ket natalgeden ti opisinada.
Iti sabali a bangir, nangayab iti polis ti maysa nga empleado ti towing service company kalpasan nga adda nadlawna a mapagduaduaan a banag iti Diokno Boulevard iti asideg ti Senado iti Siudad ti Pasay itay 8:15 iti agsapa.
Maika-5 a SONA, idatag ni Marcos ita nga aldaw
Napan a dagus dagiti bunggoy ti polis iti lugar ket kinompirmarda nga adda bomba sadiay.
Babaen ti panangipakat dagiti polis iti Render Safe Procedure (RSP), natakuatanda ti maysa a 9V battery, pagorasan, blasting cap, ken ramen a para iti bomba, ngem na-neutralize-da daytoy nga awan ti dakes a napasamak. (Aaron Recuenco/Manila Bulletin//Lito Hilidon/Bannawag)
