Iparang ni Presidente Marcos Jr. dagiti nagapuanan ti administrasionna iti las-ud ti makatawen, kasta met dagiti prioridad a paglintegan bayat ti panangidatagna iti maikalima nga State of the Nation Address (SONA) iti joint session ti Kongreso iti Batasang Pambansa Complex iti Siudad ti Quezon ita nga aldaw, Hulio 27.
Segun ken ni undersecretary ti Presidential Communications Office (PCO) Claire Castro, simple ngem nadayaw ti maikalima a SONA ti presidente.
Namnamaen dagiti mammanday linteg iti Kamara ken Senado nga iparang ni Marcos dagiti panggepna nga aramiden tapno mataming dagiti kangrunaan a parikut ti pagilian kas iti ngumatngato a presio ti magatgatang, panggedan, edukasion, panangtagiben iti salun-at, panagkunniber, ken ti impraestruktura iti maudi a dua a tawen ti panagakemna.
Iti sabali a bangir, kinuna ti Philippine National Police (PNP) nga awan ti nakitada a serioso a pangta a mangsinga iti maikalima a SONA, ken sisasaganada nga agresponde iti ania man a mapasamak. (Betheena Unite/Manila Bulletin//Lito Hilidon/Bannawag)
