Kas pangipakita ti Gobierno Lokal ti Santa iti panangipangrunana a mangsaluad iti nakaparsuaan, nangiwayat dagiti opisial ti LGU, iti panangidaulo ni Mayor Jeremy Jesus Bueno III, iti Coastal Clean-Up Day drive iti entero a lokalidad idi Hulio 24, 2026 kas paset ti pananglagip iti National Disaster Resilience Month (NDRM) 2026.
Naiwayat ti coastal clean-up babaen ti panangiwanwan ti Municipal Disaster Risk Reduction and Management Office (MDRRMO) ken ti Municipal Environment and Natural Resources Office (MENRO). Impromot ti gannuat ti pannakaipaganetget kadagiti umili ti kinapateg ti kanayon a panagsagana iti ania man a dumteng a didigra, panangsaluad iti aglawlaw wenno eco-system, ken panangisiguro nga agtalinaed a nadalus ti entero nga igid ti baybay iti hurisdiksion ti Santa.
Mainaig itoy, agyaman ti LGU Santa iti kinaanus dagiti amin a mangidaulo kadagiti departamento, ken dagiti empleado a nakikaykaysa iti pannakaitrabaho ti nadaldalus, nataltalged, ken natibtibker iti kalamidad a munisipalidad. (MARILYN CORRALES-CONTILLO)
