Ginutigot ni Presidente Marcos Jr. ti Kongreso a masapul nga amendaranda ti Electric Power Industry Reform Act (EPIRA) tapno maikkat ti systems loss charges, agraman ti value-added tax (VAT) daytoy, a baybayadan dagiti consumer iti koriente.
Indagadag daytoy ni Marcos iti maikalima nga State of the Nation Address (SONA) idi Hulio 27, a nakagun-odanna iti adu a palakpak ken standing ovation dagiti timmabuno iti Batasang Pambansa.
Segun ken ni Marcos, saan a basol dagiti consumer no adda ti makunkuna a 'systems loss' isu a saan a rumbeng nga isuda ti mangibaklay iti daytoy.
Maibasar iti EPIRA, naipabaklay kadagiti consumer ti mapukaw a koriente gapu iti panangyallatiw iti koriente (systems loss).
Kiniddaw ni Marcos iti Kongreso a buklenda ti singasing a linteg a "Sariling Kuryente Act" tapno mapalaka ken mapalag-an ti pananginstolar iti solar panel ken battery storage system iti tunggal balay ti Filipino. (Argyll Cyrus Geducos/Manila Bulletin//Lito Hilidon/Bannawag)
