Iningetan ti Philippine National Police (PNP) ti operasionda a mangkemmeg kadagiti nagpanggep a mangallukoy ken mangtignay kadagiti bumusor ken ni Presidente Marcos Jr. tapno mangpataud iti riribuk iti State of the Nation Address (SONA) a naangay idi Hulio 27.
Segun ken ni PNP chief Gen. Jose Melencio C. Nartatez Jr., binaonnan dagiti kameng ti Anti-Cybercrime Group ti PNP a mangbigbig iti kinasiasino dagiti tao ken grupo a nagpanggep a mangsinga iti SONA ni Marcos.
Palutpoten ti PNP no adda pakainaigan dagiti mangsulsulbog iti social media iti ania man a grupo a nagpanggep, ngem napaay, a mangpataud iti riribuk, agraman ti dua a suspek a nangiwayat iti dua nga insidente ti improvised explosive device (IED) iti dayta nga aldaw.
Maysa nga insidente ti panagbettak ti bomba iti arubayan ti Department of Justice, idinto a nalapdan ti panagbettak ti maysa pay a bomba iti asideg ti Senado.
Segun iti Cybercrime Investigation and Coordinating Center (CICC), siam a social media account ti nakitada a maatap nga addaan pakainaigan kadagiti hacker a nagpanggep a mangpataud iti riribuk ken panaguummong iti aldaw ti SONA.
LPA iti Albay, mangyeg iti tudo iti nadumaduma a paset ti pagilian
Innayon ti PNP nga addan pamalpalatpatanda no asino dagiti akin-aramid kadagitoy nga insidente.
Kaso a computer fraud, identity theft, grave threats, ken inciting to sedition wenno rebellion ti mabalin a maipila kontra kadagiti makemmegda. (Aaron Recuenco/Manila Bulletin//Lito Hilidon/Bannawag)
