Nobela ni Norberto D. Bumanglag Jr.
INWALIN ni Leilani ti kortina ket siniripna dagiti modelo nga agprakpraktis a magna iti akikid ngem atiddog nga entablado. Napipintasda, ken madlaw a naruamda a magna iti runway wenno entablado. Anian a pino dagiti pagnada! Kasla naamo a dalluyon ti kinnida a danggayan ti sibubukel a bagida.
Nagkarayam ti danag iti pakabuklanna. Daytoy ti damona a magna iti runway a kaduana dagiti propesional. Kabaelanna ngata?
“Your turn,” nakabukbukel ti timek manipud iti likudanna. Uray saanen a tumaliaw, ammona ti akintimek iti dayta. Ni Vhong.
Nagkidem.
Bastardo (13)
“Madanaganka?” Nariknana ti anges ni Vhong iti teltelna. Nalamiis ket kasla sinunson daytoy ti pakabuklanna.
Nagpusipos. Miningminganna ti lalaki. Adda banag a dina mailawlawag iti tunggal mingminganna dayta a naamo a rupa.
“Adda bassit...” insungbat ni Leilani. Impakitana ti agtigtigerger a dakulapna ken ni Vhong.
Nagkatawa ni Vhong. Anian a nagsam-it ti katawana. Aglalo no lumnek dagiti dua a kallidna.
“Normal dayta. Ngem maiwagsakmonto apaman a mangrugikan a magna...”
Immanges ni Leilani iti nauneg. “Thank you, Vhong... Thank you so much.”
“For what?” Pinerreng ni Vhong ni Leilanie. Kumali manen dagiti immasul a mata ti lalaki iti kaungganna.
“Iti panagtalekmo kaniak. Iti an-anusmo a nangisuro kaniak. Iti kinaidumdumam a lalaki...”
“Isunan...” insallawat ni Vhong.
“Saannak a daniwan. Makaanayen ti thank you kaniak.”
“I love you, Vhong. I love you so much...”
Dimmakkel dagiti mata ni Vhong.
“Kayatmo a sawen...”
“Nakasaganaakon iti kidkiddawem... ikasarnak...”
Inarakup ni Vhong ni Leilani. “Oh, dimo la ammo no kasano ti kinaragsakko...”
“Sika ti nangbalbaliw iti biagko. Insublim kaniak ti rayray ti biag a kunak no naatapen a mapasublik isu a diakon kayat nga iddepen.
Kasapulak iti agnanayon dayta a rayray a sika laeng ti makaipaay.”
Immirut ti arakup ni Vhong ken ni Leilani. Nagsarak dagiti bibigda. Nagdinningpilda. Napaut.
Apay nga awan ti marikna ni Leilani a sam-it wenno bara la koma? Apay a nalamiis? Gapu kadi iti napalabasna?
Nagkidem ni Leilani. Pinadasna nga inukkon ti amin a riknana. Ngem isu la nga isu, awan bara a mariknana.
“Asikasuek a dagus ti panagkasarta,” kinuna ni Vhong. Nasam-it ti isemna.
“Civil wedding laeng ti kayatko,” inkiddaw ni Leilani.
Minulenglengan ni Vhong ni Leilani. “I want the whole world to know that I’m marrying you!” inrason ni Vhong.
“Please, Vhong... Diak kayat a siak ti agbalin a linaon dagiti pagiwarnak.”
Immanges iti nauneg ni Vhong. Sa kinunana, “Okey.”
Naginnarakupda manen. Inagkan manen ni Vhong ni Leilani. Ngem kaskasdi nga awan ti naisangsangayan a marikna ti babai.
“It’s your turn...” natawan ni Leilani iti timek ni Vhong.
Apagapaman manen a nangtigerger ni Leilani. Winagwagna dagiti dua a takiagna. Pangtinnagna iti danagna.
“How do I look?” sinaludsodna ken ni Vhong.
“Stunningly beautiful, sexy and seductive. Come on, go and rule the runway.”
Immanges iti nauneg ni Leilani. Ket nagturongen iti runway.
INLUKATMO ti ridaw. Madama nga agsarsarita dagiti dua a coach iti uneg ti opisina. Agpadada a nangtaliaw kenka. Agpadada nga umis-isem. Nagderetsoka iti lamisan ni Coach Devon. Indisom ti maysa a papel. Kinita ni Coach Devon sa tinangadnaka. Nagsabat dagiti matayo. Ngem saanka latta a naguni. Timmallikudka ketdi.
Intarengtengmon ti nagturong iti ridaw. Ngem sakbay a maiggamam ti seradura, nagtimek ni Coach Devon.
“Ferdie, wait!”
Nagsardengka ngem saanka a timmaliaw.
“Start playing tonight...”
Nagpusiposka. Nagdalikepkepka a nagdas-al iti ridaw.
“I want more playing time,” kinunam.
Nagtung-ed ni Coach Devon.
“I want those sons of a bitches teammates to be more accountable on their game and mistakes.”
Nagkatawa ni Coach Devon. Umis-isem met ni Assistant Coach Drummond.
“Well, come back and have a sit,” kinuna ti coach.
Kinitam ti pagtaktakderam. “Komportableak ditoy,” impatangkenmo.
“Come on, adu ti kayatmi nga ibaga kenka.”
Naminsan pay a kinitam ti pagtaktakderam sa nagin-inayadka met laeng nga immasideg. Ingguyodmo ti maysa a tugaw ket nagtugawka.
“Umuna, thanks for getting your drug test...” kinuna ni Coach Devon a nangibagkat iti papel nga indissom iti lamisaan. Resulta dayta ti eksamen a naiwayat kenka.
“I don’t use drug, coach... never in my life!”
“Standard procedure, Ferdie. Saan a sika laeng ti na-drug test. Dakayo amin a players. Laglagipem nga iti ania man nga aramidentayo, we are covered by rules and regulations. And we have to abide by them. No saan, awan ti urnos. Nagulo. Awan ti panagtitimpuyog.”
“Ikarkarigatak ti agtungpal iti ania man a pagayatanyo, coach, ngem bay-annak a tumanor. Adalek dagiti pagbiddutak ket aturek...”
“Good.”
“I want to win.”
“Dayta ti tartarigagayak... ti tartarigagayantayo amin.”
“Ammok a nakurang pay laeng ti panagtalekyo kaniak, coach. Uray dagiti kakaduak a players, kastada met. Saandak a talken. Agduaduada iti kabaelak. Ngem ikarkarigatak a teggeden ti panagtalekda...”
Pinagsinnublatmo a kinita dagiti naginnisem a coach.
“Why the sudden change, Ferdie?” sinaludsod ni Assistant Coach Drummond a kasla maburburtiaan.
Kinitam ida nga agpadpada sa kinunam: “Kayatko a balbaliwan ti biagko, coach...”
“Wow, I’m impressed, Ferdie. But I’ll help you... We will help you change your life.” Rimmaniag ti rupa ni Coach Devon.
“Thanks, coach.”
“You’re welcome. We’ll see what you can do tonight. Ken laglagipem, manipud ita, masapul a mangabaktayo kadagiti amin nga ay-ayamtayo. Tapno pumigsa ti namnamatayo a makastrek iti playoff. No saan, nalpastayon iti daytoy a tawen. So when you play tonight, play just like this is going to be your last game.”
NAKAAD-ADU ti tao. Kas iti tunggal home game ti Wildcats, mapunno latta iti agbuya dagiti bleachers a nanglawlaw iti football field. Panatiko dagiti tao uray no maat-atiwkayo. Naragsakda latta. Umariwawada. Nalabit, mangnamnamada a mangabakkayo iti uray daytoy laeng nga ay-ayam.
Sipud pannakasuspensom, saankayo pay a nangabak. Ita, nalabit a maipabaklay manen kenka ti panangabakyo. Ket agkullayawka ta uray no kunam a nakasaganaka, naibinggas latta ti panagduaduam ken panagamak. Ngem ammom met a nasken a lalaingem ti agay-ayam. No saan? Ganggannaetto latta dagiti tagtagainepmo.
“Hi, Ferdie,” nasingaka iti nasam-it a timek.
Nagpusiposka. Ni Rhianna. Kellaat, naikali dagiti matam iti nalukaisan a naaritosan a pusegna. Nagkuy-oska pay.
“Shit,” nakunam iti unegmo. Anian a pudawna! Ti barukongna, awanen... napakidemka lattan.
“You okay, Ferdie?”
Nagtung-edka.
“Good luck. Make me proud. One win for me,” kinuna ni Rhianna sa nagtarayen a nagturong iti yan dagiti kakaduana a cheerleader.
Dimo insina ti panagkitam iti balasang. Nailansa dagiti matam iti kasla nasuksukog nga agkinnikinni a patongna. Nagwingiwingka. Ngem ad-adda laeng a maburburtiaanka iti marikriknam iti tunggal makitam ni Rhianna.
“Napintas, aya?” nasingaka iti sabali pay a timek.
Nakigtotka ngem naalawmo met laeng a dagus ti bagim. Ni Dindo.
“You’re supposed to be at work!” imbugtakmo ketdi ken ni Dindo.
“Slow-kami... siak ti nagboluntario nga agawid.”
“Pambar laeng,” kinunam a pangyaw-awanmo iti saludsodna maipapan ken ni Rhianna.
“Ken maysa, diak kayat a malibtawak ti ay-ayammo,” kinuna manen ni Dindo sa makais-isem a nagkuna: “Napintas, saan kadi?”
“Asino?” nagindidiammoka.
“Oh, come on... Ni Rhianna, napintas, saan kadi? Kursonadamon?”
“Shut up!”
Napataliaw dagiti ka-team-mo agraman dagiti tao a nakatugaw iti bleacher. Naipigsam gayam ti bosesmo.
“That’s okay, dude. Para kadata laeng daytoy,” inyarasaas ni Dindo. “Ammok a kursonadam ni Rhianna.”
Naikulengka iti apagapaman. Nalagipmo ti relasion da Rhianna ken Walter. Riribuk ngata laeng ti sumangbay iti biagmo?
“Go for it.”
“Ni Walter?” dimo napupuotan nga inyarasaas.
“Fuck him! Nakalaslastog. Kunam no asino. I hate him.”
“Riribuk ti pampanunotem.”
“Nakalaslastog daydiay. Gapu ta puraw ket kayumanggita laeng? Saan nga isu ti mangigawid kenka,” indurog latta ni Dindo kenka.
Namin-anon a pinagsawannaka ni Walter? Namin-anon nga imbagana nga adaywam ni Rhianna? Namin-adun.
“Ikkam man iti pagnakmanna ti loko. Saan a basta mailupitlupitna dagiti kas kadata a kayumangi laeng. Patastay’ met laeng, a, saan kadi?” kinuna manen ni Dindo.
“Ferdie!” nakigtotka iti pukkaw ni Coach Devon.
Tinapikmo ti abaga ni Dindo ket nagdardaraska a nagturong iti yan ni Coach Devon.
“Break a leg, dude!” inyikkis ni Dindo.
Madama ti panagsarsarita da Coach Devon ken Walter idi makaasidegka kadakuada. Adda pagsinsinnungbatanda. Kasla saanda nga agkinnaawatan.
“Apay kadi, coach?” kinunam.
“That’s final, Walter. Do it. Is that clear?” kinuna ni Coach Devon ken ni Walter.
Saan a naguni ni Walter. Kinitanaka ketdi iti natadem.
“Ferdie, ammom no asino ti kalabantayo ita a rabii?” sinaludsod ni Coach Devon.
“I don’t give a damn who they are, coach,” napardas nga insungbatmo.
Napaisem ni Coach Devon. “That’s the spirit, Ferdie. We don’t care. All we care is we gonna win. Is that right?”
“Right, coach!”
“Nangngegmo, Walter?” Tinaliaw ni Coach Devon ni Walter.
Saan a nagtimtimek daytoy.
“We are playing against Gorman High School, Ferdie,” kinuna met laeng ni Coach Devon. “They are one of the best in the nation. They are good... damn good. So we better play our best game tonight. Ta no saan, we are finished. Is that clear, boys?”
“Loud and clear, coach!” insungbatmo.
“Walter?” Kinusilapan ni Coach Devon ni Walter. “Right, Walter?”
“Right, coach... we’ll win...” awan ganaygay ni Walter a simmungbat.
“Okay, go! The team is waiting,” indagdag ni Coach Devon.
Nagbaybaykayo ken Walter a nagturong iti tengnga ti football field a pagur-urayanen dagiti ka-teamyo. Ngem sakbay a makadanonkayo iti ummong dagiti kaduayo, ginammatan ni Walter ti takiagmo.
“Listen, you prick! We are friends inside this field. I’ll treat you as equal. But as soon as we step out of this field, we are mortal enemy. Hear that?”
“The feeling is mutual, dude,” insungbatmo. “You are not my friend. And you’ll never be my friend.”
“Fuck you!”
“Fuck you, too!”
“And stay away from my girl.”
“Tell her to stay away from me.”
“You’re flirting with her!”
“No, she is the one flirting with me.”
“Son of a bitch! You’re so full of shit. You think you are someone, but you are nothing! So, I’m warning you again... stay away from my girl or—”
“Or what?” natangken ti timekmo a kasla kumarkarit.
“Adda dakes a mapasamak kenka!” inngariet pay a kinuna ni Walter.
(Maituloyto)
