Agtultuloy a tumaytayaktak ni Alex Eala iti WTA tournament kalpasan ti historiko a panagballigina iti WTA 500 Mubadala DC Open a naangay iti Washington, D.C., Estados Unidos ita nga aldaw, Agosto 4 (oras iti Filipinas).
Naital-o ni Eala, 21, iti maikawalo a puesto kalpasan nga inatiwna ni World No. 3 ken 2019 champion Jessica Pegula, iti iskor a 4-6, 6-4, 6-0, iti finals a naileppas iti dua nga aldaw gapu iti panagtudo.
Daytoyen ti kadakkelan a titulo a nagun-od ni Eala iti karerana ken umuna iti WTA Tour singles crown. Gapu iti daytoy a balligina, naital-o ni Eala kas maika-20 iti WTA live ranking.
Manamnama a daytoy ti mangparegget ken ni Eala a makisalip iti National Bank Open a maangay iti Toronto, Canada itoy a lawas, a pakairamanan dagiti siam kadagiti sangapulo a babbai a kalaingan iti tennis a da Aryna Sabalenka, Elena Rybakina, Jessica Pegula, Coco Gauff, Mirra Andreeva, ken ni Wimbledon champion Linda Noskova. (Kristel Satumbaga-Villar/Manila Bulletin//Lito Hilidon/Bannawag)
