Supiaten ti administrasion ni Marcos ti temporary restraining order (TRO) nga impaulog ti Pasig City Regional Trial Court (RTC) a nanglapped iti pannakaipatungpal iti pannakaipangato ti sueldo dagiti mangmangged iti Metro Manila, segun iti Malakanyang idi Agosto 3.
Kinuna ni undersecretary ti Presidential Communications Office (PCO) Claire Castro a sisasagana ti Office of the Solicitor General (OSG) a mangidepensa iti Wage Order No. NCR-27 a nangingato iti matgedan dagiti minimum wage earner nga agtrabtrabaho iti National Capital Region (NCR).
Saan a sinungbatan ni Castro ti saludsod no mabalinen nga ipatungpal ti naipangato a sueldo inton Agosto 13, kalpasan ti 20 nga aldaw a bileg ti TRO, idinto a saanda kayat a sakbayan ti agbalin a pangngeddeng ti korte wenno ti OSG.
Iti sabali a bangir, kinuestionar dagiti senador ti nasao a TRO, ket dinakamatda ti paglintengan iti Article 126 ti Labor Code a mangiparit kadagiti korte, ania man a pangukoman, wenno dadduma pay nga autoridad, a mangipaulog iti preliminary injunction, permanent injunction, wenno TRO, a maibusor iti ania man nga aksion, hearing, wenno aramid nga iwayat dagiti Regional Wage Board.
Segun ken ni Sen. Raffy Tulfo, dimmatag koma iti National Wages and Productivity Commission (NWPC) dagiti kompania a nangkuestionar iti Wage Order No. NCR-27, ket saan nga iti korte. (Argyll Cyrus Geducos/Manila Bulletin//Lito Hilidon/Bannawag)
