Pinagkaykaysa ni Senate Majority Leader Juan Miguel "Migz" Zubiri dagiti senador iti mayoria ken minoria tapno mabukel ti resolusion nga agkiddaw iti nadaras a pannakawaswas ti temporary restraining order (TRO) a maibusor iti pannakaingato iti sueldo dagiti mangmangged iti Metro Manila, babaen ti Resolution No. 577.
Pinirmaan dagiti amin a senador ti Senate Resolution No. 577 a mangipeksa iti panangsuportar ti Senado kadagiti Filipino a mangmangged, iti Department of Labor and Employment (DOLE), ken kadagiti ahensia a paset iti pannakaituding ti regional minimum wage.
Dinakamat ti nasao a resolusion ti Article 126 ti Labor Code, nga inamendaran ti Republic Act No. 6727, a mangiparit kadagiti korte, pangukoman, wenno dadduma pay nga ahensia, a mangipaulog iti pananglapped wenno TRO kontra iti intuding ti National Wages and Productivity Commission (NWPC) wenno dagiti regional wage board.
Suportaran ti Senate Resolution No. 577 ti ania man a legal a pamuspusan a mabalin nga aramaten ti DOLE, ti NWPC ken ti Regional Tripartite Wages and Productivity Board-NCR a mangipatungpal iti Wage Order No. NCR-27 ken mangpasingked iti proseso iti panangituding kadagiti matgedan kadagiti rehion. (Dhel Nazario/Manila Bulletin//Lito Hilidon/Bannawag)
