Winaswas ti Korte Suprema (SC) idi Agosto 5 ti dua a nagtipon a petision a nangkuestionar iti pannakataming ti kaso nga impeachment kontra ken ni Bise Presidente Sara Duterte iti Kamara.
Iti resolusion a nayetnag kalpasan ti full court session ti SC, kunada nga awanen mamaayna (moot), wenno saanen a rumbeng a risuten, dagiti naidatag a petision ta nalpasen nga inanamongan ti Kamara ken nayawaten iti Senado dagiti articles of impeachment.
Segun iti panakangiwat ti SC, ti panangyallatiw ti Kamara iti Articles of Impeachment iti Senado ti nagpatinggaan ti karbengan ti Kamara iti proseso ti impeachment, ket ania man a pangngeddeng mainaig iti legalidad ti tignay ti Kamara ken ti Committee on Justice, awanen ti epektona.
Innayon ti SC a nupay adda karbenganda a mangipaay iti pangngeddeng kadagiti nailaksid a kaso, saan a mayaplikar dagitoy iti kaso ni VP Duterte.
Mairaman kadagiti winaswas ti SC dagiti dadduma pay a petision nga indatag dagiti grupo da Atty. Israelito P. Torreon ken VP Duterte. (Rey G. Panaligan/Manila Bulletin//Lito Hilidon/Bannawag)
