Sarita ni L.B. ABLANG
APAGISU nga agsimpa ti gagan-ayan iti tangatang idi simmangpet ni Sildo, ti runner-mi. Inyawatna ti maysa a surat kaniak. Binasak:
…Agur-uraykami ditoy igid ti Carreta Nacional. Adda dua a bagontayo a pagluganantayo. Agawidka, agraman dagiti buyot a pasurotmo, ta sabalin a kompania ti sumukat kadatayo.—KAPITAN REYES
Saanak a nakatimek idi mabasa ti surat ti turayenmi. Impakitak ken ni Angelino ti surat.
“Kailala pay!” Nagsakuntip pay ni Angelino.
KLASIKO A SARITA: Kasayaatan a Sugal (2)
Kinitak ni Frisca. Nagagar ti rupana nga umammo no ania ti naglas-ud iti surat.
Inayabak ni Angelino ket imbilinko ti panangakasna kadagiti naipasdek a bantaymi iti rabii.
“Frisca, mabiitkam laeng ditoy nga immay nakiay-ayam kenka. Adda bilin ti turayenmi nga agawidkamin. Sumalogkami itan…” naalumamay ti saritak.
Saan a nakatimek ni Frisca. Kasla adda nagsullat iti karabukobna maibasar iti langana. Agsaon sa koma ngem awan sumngaw a timekna.
“Nagbiitkayon. Paturayyo koma ti agsapa ta lumawag pay. Nasipnget pay laeng ti dalanyo.”
Immisemak laengen. Dinakulapko ni Frisca. Nabayag a pinetpetak ti imana. Kinitana ti rupak a naipasir iti silaw. “Sapay koma ta dinak malipatan. Agsaraktanto manen….”
Mapilpilit ti isem ni Frisca. Idi umulogak, inlukib pay laeng ni Frisca ti tawa ti pagdagusanna a balay. Intan-awna ti silaw. Apagisu met a sumungad ni Angelino ket impakaammona a naurnosen ti bunggoymi.
“Agpakadakan ken ni Frisca, Angelino. Saysayaatem, wen?” impatigmaanko iti agkabanuag.
Dinardaras ni Angelino ti immuli iti balay ket dinakulapna ni Frisca. Diak naawatan ti nagsaritaanda ta umarimbangaw metten dagiti buyot nga imatonak.
Idi sumalogkami iti arsadanan ti purok, nakitak ti ima ni Frisca nga impayapayna pay laeng iti tawa.
“Angelino, mabalin nga ayatennakanto met laeng ni Frisca!” inyangawko idi addakamin iti nailet a dalan.
“Adda met la ngata namnama, senior?” inimtuodna.
“Always, a! Agnanayon nga adda namnama!”—O
