Impakat ti Malakanyang ti work-from-home (WFH) kadagiti opisina ti gobierno iti Metro Manila ken 15 a probinsia ita nga aldaw, Agosto 10, gapu iti agtultuloy a napipigsa a tudo a gubgubuayen ti abagat (southwest monsoon).
Mairaman iti direktiba dagiti probinsia ti Ilocos Sur, La Union, Zambales, Bataan, Rizal, Cavite, Batangas, Occidental Mindoro, Benguet, Pangasinan, Abra, Tarlac, Pampanga, Oriental Mindoro, ken Bulacan.
Segun iti Memorandum Circular No. 123 a naipaulog idi Agosto 9, maipatungpal ti alternative learning mode iti pribado ken para iti publiko a pagadalan kadagiti naapektaran a lugar, malaksid no adda sabali nga ibilin dagiti bukodda a lokal nga opisial.
Mailaksid iti direktiba dagiti agtrabtrabaho iti tay-ak ti panangtagiben iti salun-at, panangresponde iti didigra, ken dadduma pay a kasapulan a serbisio.
Naipaulog ti pammilin kas inrekomendar ti National Disaster Risk Reduction and Management Council (NDRRMC), kas panangsakbay iti mabalin nga epekto ti agtultuloy a napigsa a tudo gapu iti abagat.
Dua a petision mainaig iti kaso nga impeachment ni VP Duterte, winaswas ti Korte Suprema
Iti biang dagiti pribado a kompania ken opisina, adda kadagiti mangimatmaton ti pangngeddeng no masuspendir wenno maipakat ti work-from-home. (Argyll Cyrus Geducos/Manila Bulletin//Lito Hilidon/Bannawag)
