Nabigbig ti lokalidad ti Narvacan a fully compliant iti kaiwaywayat a Siglat Festival 2026. Naited ti rekognision iti LGU Narvacan iti panaggibus ti Siglat Gobierno Lokal 2026 babaen ti Provincial Government of Ilocos Sur itay lawasna.
Impaneknek ti pammadayaw ti agtultuloy a nalawag a pannakaiwardas ti gobierno lokal a kas pagwadan ken madadaan a mangipaay iti kasapulan ken makapnek a serbisio kadagiti umili. Kadua ni Mayora Edna Cabalo-Sanidad, DMD, da Bise Mayor Margarito Tejada, SBM Gina Cordero, SBM Michael Velasco, SBM Mark Jhun Tejada, SBM Teofilo Cabreros ken SBM Benjamin Dela Cuadra a nangawat iti plake ti tseke ti P50,000 a premio ti gobierno lokal itay Agosto 7, 2026 iti Chavit Coliseum, Vigan City.
Kas kinuna ni Mayora Edna Cabalo Sanidad, ti pammadayaw, saan laeng a pannakabigbig ti gobierno lokal no di ketdi mangipaneknek pay iti napintas a panagtitinnulong dagiti opisial ti gobierno lokal, dagiti department heads, dagiti empleado, dagiti partner agencies, ken amin a Narvacanean nga agtultuloy a mangipapaay iti suporta ken arapaap a pannakaipasdek ti nadurdur-as a komunidad.
Kinuna ni Mayora Sanidad nga idedikarda daytoy a gapuanan ken pammigbig kadagiti amin nga umili.
“Itultuloytayo nga itandudo ti pannakaipaay ti napintas ken makapnek a serbisio iti publiko, agtitinnulongtayo tapno matgun-od ti nadurdur-as pay a Narvacan,” kinuna pay ti ina ti ili. (ELISEO B. CONTILLO)
