Agtaltalinaed a prioridad ti Gobierno Lokal ti Santa ti pannakaisiguro ti kinatalged dagiti umili nangruna iti isasangbay dagiti kalamidad kas iti isasaplit ni Bagyo Maymay, a sinaruno ti awan sardayna a nepnep a nanglayus iti lokalidad ken dadduma pay a paset ti Ilocos Sur.
Agtultuloy ti pannakikoordinar ti LGU Santa iti Office of Civil Defense 1 (OCD 1) ken iti gobierno probinsial ti Ilocos Sur iti panangidaulo ni Gob. Jerry Singson tapno napardas ti pannakaidanon dagiti tulong kadagiti apektado nga umili a kas iti naisayangkat idi Agosto 10, 2026 iti Santa Multi-Purpose Building.
Mainaig itoy, impeksa ti mayor ti Santa a ni Atty. Jeremy Jesus Bueno III ti panagyamanna iti OCD 1 ken iti gobierno probinsial iti naipaay kadagiti Santanians. Iti panangidaulo ni PSWD Officer Noemie Kathleen Balbuena, ken ti Municipal Social Welfare and Development Office nga idauluan ni MSWDO Genevieve Balbuena, naidanon iti aganay a 150 a pamilia a nakaro ti pannakaapektarna iti layus dagiti suplay a kasapulanda.
Kinuna pay ni Mayor Bueno nga agtultultuloy a bambantayan ti Municipal Disaster Risk Reduction and Management Office (MDRRMO) dagiti barangay ti igid ti baybay ken dagiti dadduma pay a malaylayus a lugar iti lokalidad. (MARILYN CORRALES CONTILLO)
