Nobela ni Norberto D. Bumanglag Jr.
ELEGANTE ti sleeveless a puraw a bestidana. Kimmepkep iti pangrapisen a bagina—nga ad-adda a nangiparammag iti nabaknang a barukongna. Adu ti nangdillaw iti barukongna. Ad-adda kano a dayta ti taliawen ti agbuya ngem ti aruaten a kayatna nga i-promote. Ngem saan nga immanamong ni Vhong. Isu kano ti pangawisna tapno buyaenda ti kawesna. Ad-adda a wimmasnay a kitaen dagiti gurongna gapu iti dua a pulgada ti ngatuanna iti tumengna a putol ti bestidana ken uppat a pulgada ti takon ti puraw a sapatosna.
Nagpatengnga iti ridaw ti runway. Makitanan dagiti adu a tao iti agsumbangir ti runway a nakatangad kadagiti agsasaruno a modelo a magmagna, pasaray agsardeng, agpuligos, ken agwang-it. Pormal ti langada.
Immanges iti nauneg ta mariknanan ti panagtigerger dagiti laslasagna. Nagkidem ngem makitana latta ti gilap dagiti adu a kamera a pangretratoda kadagiti modelo. Adu dagiti reporter. Adu dagiti pannakabagi dagiti department store a mangsirig kadagiti aruaten a maimodelo. No napintas ti performance-na ita ket magustuanda ti bestida nga ipagnana, mabalin nga adda namnamana a rumaniag ti biagna iti modeling industry.
“Leilani... go...” nangngegna ti signal.
NOBELA: Saan a Rosas Amin nga Ayat, Maria Emmanuelle (18)
Nagmulagat. Inukkonna amin a riknana. Nagna...
Apagapaman a nagkutukot dagiti tumengna. Kasla riknana ti matublak. Saan! kinunana iti bagina. Kabaelanna daytoy. Saan kadi a daytoy ti nabayagnan nga inur-uray?
Intuloyna ti nagna. Natalnan ti riknana. Natalingenngenen. Kontroladonan ti situasion. Kasla nalamuyot a dalluyon ti panangigunayna iti bagina. Nagkinni. Nagpusipos. Nagwang-it. Nagsaplit ti pangatiddogen bassit a blondie a buokna. Saan nga immisem. Saan kadi a namin-adun a naibaga kenkuana a dagiti matana ti rumbeng nga umisem? A saan a ti bagina ti ilakona? A ti inaruatna ti nasken a madlaw dagiti agbuybuya?
Naggilap dagiti kamera. Nakaul-ulimek ti tallaong. Kasla nabatombalanida iti pintas ti lung-ayna; ti kinaelegantena a nagna iti runway; ti makaguyugoy a pammagina iti napintas a bestida. Ket idi maungpotna ti runway, naibuang ti nakatitileng a palakpak, ken makasul-ot a sultip, ket ad-adda pay a naggilap dagiti makabulsek a flash dagiti adu a kamera.
TINALAWATAWAM nga immuna dagiti kakaduam sakbay a nagkubboka a nangkita iti center guard a nakaiggem iti bola. Nakaposisionkayo aminen. Dakayo ti mangitaray iti bola iti end zone. Nakasagana metten ni Walter a mangawat iti bola iti center guard. Binayabay ida ti dua a running back. Iti ungto ti kanigid ken kanawan ti football field, nakitam itay a nakasaganan dagiti dua a wide receiver a tumaray nga agturong iti end zone a mangsippaw iti bola no isuda ti pakaipasaanda.
Sinaggaysam a minatmatan dagiti kalabanyo nga adda iti asidegmo. Daddakkel ken nabibiskedda. Nakair-irteng dagiti rupada. Kunam no wrestler-da a nakasagana a manggabbo kadakayo. Ngem maymaysa ti nangipannurokam iti panagkitam. Ti bola. Asino man a kaduam a makaiggem iti dayta a bola, isu ti salaknibam tapno maitarayyo iti end zone ket makapuntoskayo.
“We have to win at all cost, Ferdie. No maabaktayo ita, pagpatinggaanen ti season-tayo,” nalagipmo manen ti impaganetget kenka ni Coach Devon.
Saan a mapasamak dayta, limteng iti panunotmo. Ta no maatiwkayo ita, isu metten ti pagpatinggaan ti arapaapmo.
Nagpingki dagiti ngipenmo. Saanmo la ketdi a maipalubos a mapasamak dayta. Nasken a mangatiwkayo... iti uray ania a wagas.
“Three! Two! One!” inriaw ti center guard. Napardas ti panangipasana iti bola ken ni Walter. Nagsanud daytoy a nangiwaras iti panagkitana kadagiti wide receiver a napardas nga agtartaray nga agturong iti end zone. Ngem agpadada a nakaguardia. Intultuloyna ti nagsanud a mangsalaknib iti bola ken tapno saan a maasitgan dagiti tackler.
Dayta ti akemmo. Siniputam amin dagiti tackler nga agpanggep a mangtumba ken ni Walter ket lapdam ida. Baliktadem ida. Maki-wrestling-ka no kasapulan. Ket nagballigika. Agkaraudatal dagiti dungsuem a kalabanyo nga aggandat nga umasideg ken ni Walter. Ket naipasa ni Walter ti bola iti running back, a nakaitaray met iti bola iti sangapulo a yarda sakbay a natublak. First down.
Nag-formation-kayo manen. Iti daytoy a gundaway, siniguradom nga awan ti makasagid iti quarterback. Naikkan iti naan-anay a gundaway a mangipasa iti bola. Naka-score-kayo. Touchdown!
Guest: 0; Home: 7.
Ngem nalaing ti Gorman High. Uray kasano a panagtarigagay ti defensive team-yo a mangpasardeng kadagiti kalabanyo a mangi-touch-down iti bola, awan latta ti maaramidanyo. Agsinsinnublatkayo a maka-score. Agingga iti nakadanon ti ay-ayam iti second half.
Ti score: Guest: 21; Home: 20.
Maab-abakkayo. Isuda pay ti akimbola. Madanaganen ni Coach Devon. Makasuronen. Agtabtabbuga. Sangkairiakna ti defensive team-yo. Sangkakugtarna ti daga.
Uray sika, makasuronka. Mangemkemkemka manen. Makasuronka ta awan maaramidam ta addaka iti ruar. Kasuronmo met dagiti kakaduam. Kasla mabutbutengda nga agay-ayam. Saanda a mairuar ti amin a kabaelanda. Kasla saanda nga agtalek iti bagida. Kasla mabutengda nga agbiddut.
Immasidegka ken ni Coach Devon. “Put me in, coach,” kinunam. “I’ll stop them.”
Minatmatannaka ni Coach Devon. Kawaw ti rupana. Nagwingiwing. “Nabannogkan,” kinunana.
“No, put me in, coach!”
“Masapulka nga offensive guard.”
“But we need to stop them!”
Immanges iti nauneg ni Coach Devon. Nagturong iti assistant-na. Nagsaritada. Saan a nagbayag, nagsubli iti yanmo.
“Okay, go in and stop them!” nabileg ti bilin ni Coach Devon.
Nagtung-edka. Nagtarayka a nagpatengnga. Nakigrupoka iti team-yo. Nagkikinnita dagiti kakaduam ngem saanmo nga inkaso ida. Nagpuestoka kas tackler. Impasangoda kenka ti kasla refrigerator nga offensive guard. Nakangirsi daytoy kenka. Isu ti mangtumba kenka sakbay a makadanonka iti quarterback. Nakipinnerrengka iti daytoy.
Nagpukkaw ti center guard ti kalabanyo. Pinidutna ti bola sa inyawatna iti quarterback. Nagsanud ti quarterback ket sipapardaska a timmaray a nangliklik iti dakkel nga offensive guard. Pinadasdaka a pasardengen dagiti sabali nga offensive guard ngem napadsom amin ida. Nakitanaka ti quarterback. Nagsanud nga immadayo kenka ngem awan ti sabali a papananna. Makaasidegen dagiti kakaduam a mangtublak kenkuana. Napilitan a nangibato lattan iti bola tapno saan a ma-tackle.
Saan a mayabante dagiti kalabanyo ti bola iti sangapulo a yarda. Kapilitan nga inkugtarda ti bola nga isubli kadakayo. Napalaus ti isem ni Coach Devon. Nakitam dayta iti itataliawmo iti pagtaktakderanna iti igid ti football field.
UMARIWAWA dagiti agbuybuya. Dandanin awan ti arindenggan iti aglawlaw. Yik-ikkisda ti “Wildcats!” Maulit-ulit. Sa yikkisda ti “Ferdie! Ferdie!” Maulit-ulit met. Magustuanda ti mapaspasamak. Mariknada a kasla kabaelan nga abaken ti Las Vegas High ti Gorman High. Gapu amin dayta ken ni Ferdie.
“Talaga a nalaing, boss!” arig ipukkaw ni Sergio iti selponna. Immadayo iti kaaduan ti tao ta di maawatan ni Rico ti ibagbagana. “Kasla isu laeng ti namnamada a mangabak iti Gorman High!”
“Ania ti score?”
“21-20, boss! Gorman High...”
“Shit. Isu dayta ti nalaing? Mangab-abak pay laeng ti Gorman High. Asino ti akimbola?”
“Las Vegas High... 3 minutes remaining. Ngem addada iti field goal range, boss. No isardengdan ta kugtaranda ti bola, mabalin a makapuntosda iti tallo.”
“Ania ngarud ti ar-aramidenda?”
“Dida agtalek iti kabaelan ti kicker-da, boss, isu nga ituloyda nga itaray ti bola agingga iti end zone.”
“Kayatda nga i-touchdown imbes a field goal?”
“Yes, boss.”
“Ket ania ti namnamada? Can they win?”
Immanges iti nauneg ni Sergio. Liningayna ti football field, iti nasilawan a bulletin board a nakaisuratan ti agdama a kasasaad ti ay-ayam. Nakurangen a dua a minuto sa malpas. Nasken a makapuntos ti Las Vegas High, ta no saan, maatiwda.
“Si puede... y no puede, boss... Naiget ti depensa ti Gorman High...”
“No maatiw ti Las Vegas High, saandan a makiay-ayam pay, saan kadi?”
“Wen, boss... isu a nasken a mangabakda.”
“Time, Sergio?”
“One minute, boss. Fourth and field goal.” Kayatna a sawen, saan a naigunay ti Las Vegas High ti bola iti sangapulo a yarda. Maikkanda iti tallo laeng nga attempt a mangigunay iti bola iti sangapulo a yarda. No saanda a maaramid, ikugtarda ti bola nga ited iti kalabanda. Ngem agsipud ta addadan iti field goal distance iti end zone, mabalinda a padasen iti maikapat nga attempt. No saanda a maka-score, nalpasen ti laban. Mangabak ti Gorman High.
“Ni Ferdie, sadino ti yanna?” nangngeg ni Sergio iti selponna.
“Inserrekda a runningback, boss...”
“Shit, usarenda iti uray ania a posision?”
“Kabaelanna, boss. Natangken ti bagina. Mabalinna nga isangdo. Kabaelanna nga iwalin ti asino man nga agtarigagay a mangpasardeng kenkuana. Lima laeng nga askaw, makagtengen iti touchdown zone. Nakapormasiondan, boss...”
“Okey, saanmo nga...” Awanen ti naawatan ni Sergio ta kellaat a timpaw ti nakapigpigsa nga ikkis a nangrimbaw iti boses ti boss-na. Nakanganga metten. Saanen a makaasngaw gapu iti nakitana. Kumalimbatog metten dagiti agbuybuya. Kugkugtaran dagiti dadduma ti aluminum a bleacher.
Touchdown! Kasla awan aniamanna nga intaray ni Ferdie ti bola agingga iti end zone. Kasla nambaan a tinulidna dagiti manggandat a mangpasardeng kenkuana. Kasla limmasat nga alipugpog. Napanganga pay dagiti taga-Gorman High, kasla estatuada ta saanda a mamati iti napasamak. Iti umuna a gundaway, inabak ida ti Las Vegas High!
“Sergio... Sergio!” nangngeg manen ni Sergio ti timek ni Rico iti selpon. Agpukpukkawen daytoy. Nagmawmawen ti ikkis dagiti tao.
“Sorry, boss! Nakaar-ariwawa dagiti tao. Ngem nangabakda, boss... Touchdown!”
“Wow!”
“Bilibka kenkuana, boss... talaga a nalaing!”
Nangngeg ni Sergio ti nauneg nga anges ni Rico. “Kayatko a salaknibam a naimbag dayta a Ferdie. Kayatko a nakaradkad agingga iti championship. Mamatiak nga adda gundawayda a makadanon iti championship. Isu a diak kayat a masugatan. Kayatko nga agbalin a nakaradkad.”
“Boss...” nayesngaw ni Sergio. “Saan kadi a kabusortayo ni Ferdie?”
“Wen. Ngem kasapulak pay laeng, Sergio... Adda dakkel a planok para kenkuana. Isu a nasken a salakanibam iti ania a wagas!”
“Ngem, boss...” imparikna ni Sergio ti panagkedkedna.
“Awanen ti adu a ngem, Sergio!” natangken ken nabileg ti timek ni Rico. “Diak kayat a mangngeg dayta. Ti kayatko, salaknibam dayta nga agtutubo ta no adda dakes a mapasamak kenkuana, dakdakes ti mapasamak kenka, nalawag?”
“W-wen, boss...” nakapsut ti arinkedkeden a sungbat ni Sergio.
KAMKAMATEM pay laeng ti angesmo. Nai-touchdown-mo ti bola a kasla awan aniamanna. Binaliktadmo amin dagiti nagpanggep a mangpasardeng kenka. Ket apaman a naka-touchdown-ka, inaribuyotandaka dagiti kakaduam. Inarakup ken rinugmaandaka. Uray la a napaiddakayo iti karuotan iti kaaduda nga immarakup kenka. Kakaasika a nangak-akkal kadakuada. Madi latta ti mariknam no maidekket ti bagi dagiti lallaki kenka.
Uray ni Coach Devon, inarakupnaka. Ngem immikayka a dagus kenkuana.
“Good job, Ferdie... I’m really proud of you!” kinunana sa tinapikna ti abagam.
Simmaruno a nangarakup kenka ni Assistant Coach Drummond. Dinaydayawnaka. Uray dagiti dadduma pay a defensive coordinator a coach, dinaydayawdaka. Isuda amin, dinaydayawdaka. Ket napalaus ti panangipannakkelmo iti bagim.
Ngem adda maysa a tao a dimo napakpakadaan nga immarakup kenka. Nakair-irut ti arakupna. Makapalusdoy ti banglo ti bagina. Nakalamlamuyot ti barukongna a naidingpil kenka. “I’m so proud of you, Ferdie! You’re so good,” kinuna daytoy ket iti panangimulana kadagiti bibigna iti pingpingmo, apagisu met a nagsabat dagiti matayo ken Walter. Nakamulagat iti dakkel. Mailangaam latta ti saan a maabbed a rurodna kenka. Nalagipmo ti pangtana kenka.
“You wanna go out tonight to celebrate, Ferdie?” intangad ni Rhianna kenka a nakaiggem pay laeng iti dakulapmo. “Come on....” ginuttana ti takiagmo.
“I...” inulodmo ti saom. Kayatmo manen ti kumita ken ni Walter.
“Are you scared of Walter?”
Nakigtotka iti saludsod ni Rhianna. Saanka a nakasungbat.
“Come on... dimo ibaga a mabutengka ken ni Walter?”
Nagwingiwingka sa liningaymo manen ni Walter. Kasla estatua daytoy a nakatakder a mangbuybuya kadakayo ken Rhianna.
“Of course, not...” impainayadmo a kinuna. Ngem sumalikepkep latta ti pangta ni Walter kenka. Kayatmo ti agbalbaliw. Kayatmo ti umadayo iti riribuk. Makaanay kadi ni Rhianna a sukat ti mabalin a pannakaisarsarakmo manen?
“Pick me up. Ammom met no sadino ti balaymi.”
“Ah...”
“You’re having a second thought. Still afraid of Walter?” Iti tebbagna, kasla mapukpukaw ti panagtalek ni Rhianna kenka.
“No... Ah, I don’t have a car...” nagbeddalka pay a mangibaga gapu iti bainmo. Sangapulo ket walon ti tawenmo ngem awan pay luganmo.
Nagkatawa ni Rhianna iti nakapsut. “Okay, I’ll pick you up. Sabado met no bigat. So, eight, okay?” Tinangadnaka manen ni Rhianna. Idi agsabat dagiti matayo ken maikali dagiti narimat ken immasul a matana kadagiti matam, mariknamon ti panaglulokenmo. Awanen ti kiredmo pay nga agkitakit.
Nagtung-edka.
Nakaragragsak ni Rhianna. Inulitna pay a binisong ti pingpingmo sa nagtaray a nagsubli iti yan dagiti kakaduana a cheerleader.
Liningaymo ni Walter. Nakatakder pay laeng a mangbuybuya kenka. Umap-apuy dagiti matana.
(Maituloyto)
