Dimmatag dagiti grupo ti mangmangged ken kameng ti party-list iti Korte Suprema (SC) idi Agosto 12, tapno ipawaswasda ti temporary restraining order (TRO) nga impaulog ti Pasig City regional trial court (RTC) kontra iti ₱85 a nayon a sueldo dagiti mangmangged iti Metro Manila.
Nairaman kadagiti nangipila iti petision ti grupo a Kampihan ng Maralita at Manggagawa ken ni Party-List Rep. Elijah Rumbaoa San Fernando, Workers and Peasants’ Party of the Philippines, UNI Global Union-Philippine Liaison Council, Federation of Free Workers, National Federation of Labor, Sentro ng Nagkakaisa at Progresibong Manggagawa, Unified Filipino Service Workers, Partido Manggagawa, ken ti Council of Teachers and Employees in Schools, Colleges and Universities in the Philippines.
Agpaay a respondent ti dua a korte ti Pasig City RTC ken maysa iti Navotas City RTC, kasta met ti sumagmamano a kompania kas ti Readycon Trading and Construction Corporation ken ti Alliance of Philippine Fishing Federations, Inc.
Kiniddawda pay iti SC a maipasardeng koma ti panangtaming ti trial court iti mainaig iti panagngato iti sueldo.
Segun iti petision nga impila ti grupo, adda direkta nga epekto ti panagngato iti sueldo kadagiti mangmangged iti kalinteganda a maaddaan iti makasustenar iti panagbiag a matgedan iti National Capital Region kasta met iti ekonomia ti pagilian.
Edukasion, impraestruktura, prioridad iti 2027 national budget
Inlawlawag dagiti nagpetision nga inkamangda iti SC ti pannakarisut daytoy ta awanen ti sabali pay a napardas ken umdas a nainkalintegan a pamuspusan a mangilisi kadakuada iti makadadael nga aramid ti respondent a nanglabsing iti kalinteganda a protprotektaran ti Konstitusion. (Rey G. Panaligan/Manila Bulletin//Lito Hilidon/Bannawag)
