(MAIKA-19 A PASET)
NAUDI a sinerrekmi ti maysa a night spot iti Kiosi. Masansan a mabasak kadagiti diario dagiti happening iti daytoy a night club. Kas pagsasao, hangout daytoy dagiti high and the mighty, dagiti cream of the crop of society.
Adda daytoy eksklusibo a night club iti ground floor ti maysa kadagiti kalalatakan a hotel iti Epifanio de Los Santos Avenue. Iti maysa a kalye iti likudan ti SM Mega Mall iti Cubao. Saan a basta no asino ti makastrek iti daytoy. Napaneknekak daytoy idi saandakami a pastreken dagiti tallo a natatayag a security guard iti ridaw. Umuna, gapu iti aruatmi. Nakakasualkami laeng ken Tina. Kasla met nga ubbingkami kano pay. Menor de edad.
Ngem adda inruar ni Tina a bimmalitok a card manipud iti petakana. Daytoy ti impakitana kadagiti security guard. Apaman a nabigbig dagiti guardia ti maris-balitok a tarheta, nagbalbaliw a dagus ti panangtratoda kadakami. Sinaluduandakami a pinastrek.
NOBELA: Bastardo (15)
Kasla tulbek iti paraiso ti golden card ni Tina. Ket para kaniak, umun-uneg met ti kinamisterioso a nangbalkot iti kinataona.
Nasipnget iti uneg. Dua a floor manager, babai a kasla naka-gown ken natayag a lalaki a nakaamerikana, agtawenda ngata iti apagsurok a duapulo ket lima, ti nangsabat kadakami. Adda saggaysada a nakasindi a napadumog a flashlight nga iggemda.
Kinablaawandakami. “Table for how many, sir?” dinamag ti babai.
“For two.” Ni Tina ti simmungbat.
“Where do you prefer, ma’am?”
“Any of the corners, please.”
Iti maysa a basssit a lamisaan a nairanta laeng iti dua ti nangituludan kadakami ti lalaki a floor manager. Ginuyodna ti maysa kadagiti tugaw, ditoy a nagtugaw ni Tina. Kalpasan ti sumagmamano a kanito, adda immasideg a lady supervisor ken serbidor a naka-tuxedo. Dagitoy ti nangala iti ordermi.
Kas kadagiti immun-una a night spot a sinerrekmi, margarita latta ti inorder ni Tina nga inumenna idinto a nalag-an laeng a serbesa kaniak.
Nasipnget ti dance floor. Aragaag laeng dagiti agsasala a mangkumkumpas iti tokar ti maysa a mini-orchestra iti maysa a suli. Adu ti kustomer ti klab itoy a rabii.
Inuraymi a maiserbi dagiti bilinmi nga inumen.
“You care for an appetizer, ma’am, sir?” dinamag ti waiter apaman a naidissona dagiti inumenmi manipud iti tray a tapayana.
“Later,” insungbat ni Tina.
Naparagsit ti toktokaren ti mini-orchestra. Namrayanmi a sinimsiman dagiti ordermi. Ngem idi agbalin ti tokar nga slow drag, iniggaman ni Tina ti maysa a dakulapko.
“Come,” kinunana, “let’s dance.”
Nagpatengngakami iti dance floor. Dandani saanko a maisipasip dagiti pareha iti aglawlawmi. Idi awidek ti siket ni Tina, inngatona ketdi dagiti takiagko nga imparabaw kadagiti abagana, isu ti nangarakup kaniak. Nabanglo ti puon ti layapagna, kasta met dagiti buokna. Adda mapaspasgedan a temtem iti barukongko a mangramramaram iti amin a paset ti bagik.
Nadlawko ti apagapaman a pagnagkabsiw dagiti saka ni Tina no agkumpas. “You’re tipsy,” inyarasaasko.
“No...”
“Yes, you are...”
“Then hold me tight,” kinunana nga immirut ti arakupna kaniak, “so I won’t fall...”
Ti temtem iti barukongko, nagbalinen a gil-ayab a mangipangpangta iti pannakauram ti sibubukel a bagik.
Ngem nariknak a saan laeng a siak ti ramramaramen ti gil-ayab. Uray ni Tina. Inyangadna ti rupana, nariknak ti bara ti angesna iti rupak.
“Kiss me,” kinunana.
“T-Tina?”
Nagkidem. “Kiss me, please...”
Indennesko dagiti bibigko kadagiti agar-arimasa a bibigna. Apagapaman laeng. Napnuan alikaka. Iti laksid ti amin, saan pay a naan-anay a naglumen ti mariknak a panagraem ken panangigigir kenkuana. Dakkel ti pammatik a gapu laeng iti pannakainumna isu a maar-aramidna ti kastoy.
“Give me your French kiss...”
“T-Tina...”
Inrakus ni Tina dagiti takiagna iti agsumbangir nga abagak, imparabawna dagiti dakulapna iti teltelko. Nagay-ayam ti dilana kadagiti bibigko. Iti dayta nga inaramidna, awanen ti nakaidumaak iti simgiab a pempen ti nabakir a narangirangan a pagtungo iti pugon no kasta nga agpair-ir iti birhinia iti kalgaw.
“Say you love me...” inyanangsabna.
“I... I love you. Tina...”
Ad-adda nga immirut ti panangappupo dagiti dakulap ni Tina iti teltelko.
PASADO ala una iti adalem a parbangon idi rimmuarkami iti dayta a night spot iti EDSA. Nakasanggir a nakakidem ni Tina idinto a nakarakus dagiti takiagna kaniak bayat ti panagmanehok.
“Ania, itulodka laengen?” kinunak.
Nagmata ni Tina. “No...”
“But you’re drunk. Amangan no ania ti mapasamak kenka iti dalan.”
“I’m only tipsy, not drunk. Kabaelak pay laeng a yawid ti bagik, okey?”
Saanakon a nagtimek. Ammok nga uray ania ti aramidek, nakaikeddengen ni Tina.
Imparadak ti kotse iti sango ti apartment nga ab-abangan da Tia Caring iti Murphy District.
“Good night,” kinunak. “Thank you for a very wonderful evening.”
“Agurayka,” kinunana.
Dimsaag ni Tina iti kotse; iggemna ti tulbek. Likutanna ti compartment daytoy. Dua a bag a plastik, bassit ken dakkel, ti binitbitna nga inruar. Inyawatna kaniak dagitoy.
“’Nia dagitoy?”
“Dayta basbassit, para ken ni Tia Caring. Dayta dakdakkel, para kenka. Basta kitaenyonto lattan no ania ti linaonda, okey?”
Nangriknaak. “Nakababain sa daytoyen...”
Naglibbbi. “Hus, dika man,” kinunana. “Nang i-French kiss mo ako kanina, hindi ka nahiya. Ngayon pa?”
“Sika a talaga...”
“Gusto mo bang ulitin ‘yon?” insutilna idinto nga inkarusna dagiti takiagna iti tengngedko. “Gusto mo bang ulitin, ha?”
Saanak a nakatagari.
“Huwag na lang muna,” kinunana. “Saka na lang. I-good night kiss mo na lang ako...”
Apagapaman ti agekko kadagiti bibigna. Inukasna dagiti takiagna iti tengngedko.
“Good night. Este... good morning na pala. But sleep well, okay?”
Insursurotko ti panagkitak iti kotsena agingga idi agpukaw daytoy iti pagpikuran iti abagatan.
(Maituloyto)
