Napadayawan ni Reina Ysabel Garcia, Sangguniang Kabataan Chair ti Barangay Labut Norte a kas maysa kadagiti Ten Outstanding Youth Leaders of Ilocos Sur (TOYLIS) iti 2026.
Naipaay ti pammadayaw idi Agosto 7, 2026 iti Chavit Coliseum Vigan City, kas paset ti Siglat Festival iti probinsia ti Ilocos Sur iti panangidaulo ni Gob Jerry Singson, kas pammigbig kadagiti agtutubo nga Ilokano iti dakkel a kontribusionna iti pannakapadur-as ti kasasaad ti barangay, naisangayan a panagserbi, ken maipagpannakkel a wagas iti panangidaulo.
Mainaig itoy, kinablaawan ni Mayor Atty. Jeremy Jesus Bueno III ken dagiti opisial ti gobierno lokal ti Santa ti maipagpannakkel a lider agtutubo a patanor ti Santa.
Kinuna ni Mayor Bueno a ti dedikasion ken mapangnamnamaan a panangidaulona kadagiti padana nga agtutubo, ti itutulongna kadagiti trabaho iti komunidad ken kadagiti opisial ti Barangay Labut Norte, agtultuloy a manginspirar saan laeng a kadagiti kabarangayanna no di dagiti amin nga agtutubo iti Santa..
“Ammona nga isakit dagiti padana nga agtutubo ken ipangpangrunana ti pagsayaatan dagitoy. Dayaw ken ipannakkel ti sibubukel nga ili ti Santa ti pannakabigbigna,” kinuna ni Mayor Bueno. “Dagiti kas ken ni SK Chair Reina Ysabel Garcia ti pammaneknek nga adda kadagiti agtutubo ti namnama ti masakbayan. Maysa a lider nga agtrabtrabaho para iti panagbalbaliw ken pagimbagan ti kaaduan,” kinuna pay ti ama ti ili. (MARILYN CORRALES-CONTILLO)
