Tallo nga Ilokano a maipagpannakkel nga opisial ti Philippine National Police (PNP) ti naital-o a Brigadier General itay nabiit, da PBGen. Julius C. Suriben, PBGen. Marlo Castillo, ken PBGen. Edwin C. Balles.
Agpapada dagiti tallo a heneral a beterano a pannakabagi ti linteg, kamengda iti Philippine National Police Academy (PNPA)-- Kabalikat Class of 1998 da Gen. Suriben ken Gen. Castillo idinto a Kapanalig Class of 1997 ni Gen. Balles.
Nalatak iti awagna a kas “Manong Pulis Jools” gapu iti kinasingedna kadagiti umili, agpapaay iti agdama ni General Suriben a Senior Executive Assistant ni Gen. Jose Melencio Nartatez, Chief, PNP. Sakbayna, nagpaay a Chief, Supply Management Division ti PNP Directorate for Logistics, ken Chief, Regional Staff, Police Regional Office 4A (Calabarzon). Nagtakem iti nadumaduma a sensitibo a posision, nagserbi pay a Provincial Director ti Ilocos Norte Police Provincial Office. Nakalalagip ti panagpaayda nga agpadpada ken General Castillo a hepe iti Narvacan MPS.
Nalatak met ni General Castillo iti awagna a “Serbisyong M.A.C.” Agpapaay iti agdama nga Executive Officer, Directorate for Personnel and Records Management (DPRM), iti Camp Crame. Sakbayna, nagserbi a Provincial Director ti Ilocos Sur Provincial Police Office, nag-Chief of Police iti Vigan City, Candon, kdpy. Tubo ti Salcedo, Ilocos Sur, maysa a mannursuro ni General Castillo sakbay a simrek iti PNP.
Anak met laeng ti Salcedo, I.S. ni General Edwin Col-long Balles. Agpapaay iti agdama a Director, PNP Anti-Kidnapping Group (AKG). Nagserbi nga Executive Officer, Directorate for Intelligence, Provincial Director, Leyte Police Provincial Office.
SK Chair Reina Ysabel Garcia ti Santa, 2026 Ten Outstanding Youth Leader of Ilocos Sur
Natubay a pannakabagi ti linteg, naipasungalngal ni General Balles a nanggubat iti kriminalidad ken nangwara iti grupo dagiti pagbutbutngan a kidnap for ransom group iti pagilian. Mabigbig ni General Balles iti kinaadu ti nasolbarna a kaso ti high profile kidnapping case iti nadumaduma a paset ti pagilian. (ELISEO B. CONTILLO)
