Nabigbig ti Santa SK Federation a kas National Finalist iti prestihioso a Philippine Sangguniang Kabataan Awards 2026 para iti dua a kategoria: Outstanding Council Category ken Outstanding SK Project Category (Human Development and Social Welfare): “No Story Left Behind: The CEAP-ALS Ordinance.”
Daytoy naidumduma a pammigbig iti nasional a lebel ti mangipaneknek iti kinapudno, kinasayaat, ken napudno a panagserbi dagiti agtutubo a Santanians para iti pagsayaatan ken panagdur-as ti sibubukel nga ili ti Santa.
Mainaig itoy, kablaawan ti sibubukel a gobierno lokal ti Santa, Ilocos Sur, iti panangidaulo ni Mayor Jeremy Jesus Bueno III, ti Sangguniang Kabataan Federation ti Santa nga idauluan ni PPSK President Maria Angela B. Oriente, RSW.
“Agyaman ti sibubukel nga LGU Santa iti awan sarday a panangipaay ti Santa SK Federation iti makainspirar ken naidumduma a serbisio. Saludo ti sibubukel nga ili iti naidumduma a balligi ti Santa SK Federation,” innayon ti mayor. (MARILYN CORRALES-CONTILLO)
