Tallo a bagyo ti bambantayan ti Philippine Atmospheric, Geophysical and Astronomical Services Administration (PAGASA) ita nga aldaw, Agosto 18: ni Tropical Depression Neneng nga adda iti Philippine Area of Responsibility (PAR) ken dua pay nga adda iti ruar ti PAR.
Segun iti waragawag ti PAGASA itay 4:00 iti parbangon, adda ni Bagyo Neneng iti 675 a kilometro iti daya ti Itbayat, Batanes, nga addaan iti kapigsa a 55 a kilometro kada oras iti asideg ti sentrona ken pugso nga agingga iti 70 a kilometro kada oras.
Agpalaud-amianan a laud ni Neneng ken mabalin nga agdisso iti daya a baybay ti Taiwan inton Huebes (Agosto 20) iti malem, ken agsapa iti Biernes (Agosto 21).
Nupay awan ti direkta nga epektona iti pagilian, papigsaen ni Neneng ti abagat (southwest monsoon) a mangyeg iti napigsa a tudo iti Zambales, Bataan, ken Occidental Mindoro iti las-ud ti 24 nga oras.
Kalalaingan agingga napigsa a tudo ti mangapektar iti Metro Manila, Ilocos Sur, La Union, Pangasinan, Abra, Benguet, Tarlac, Pampanga, Bulacan, Nueva Ecija, Laguna, Rizal, Cavite, Batangas, ken Oriental Mindoro.
Grupo dagiti mangmangged, nagkamang iti SC mainaig iti TRO ti ₱85 a nayon a sueldo
Iti sabali a bangir, ti bagyo a dati nga inawagan ti PAGASA a kas LPA 08g nga adda iti 670 a kilometro iti laud ti Calayan, Cagayan ken agpalaud nga agturong iti China iti kapardas a 20 a kilometro kada oras, ket saan met a direkta a makaapektar iti pagilian.
Ti maikatlo a tropical depression ket adda 3,090 a kilometro iti daya ti amianan a daya ti Mindanao ken nabuntog ti panaggunayna.
Segun ken ni PAGASA weather specialist Chenel Dominguez, saan pay a masigurado no makaapektar daytoy iti pagilian ngem mabalin a papigsaen daytoy ti abagat a mangyeg manen iti napipigsa a tudo iti pagilian inton umay a lawas. (Ellalyn De Vera-Ruiz/Manila Bulletin//Lito Hilidon/Bannawag)
