Nobela ni NORBERTO D. BUMANGLAG JR.
SANGKATALIAWMO ti nakawakwak a sarming a tawa ti maikadua a kadsaaran ti apartment nga up-upaanyo. Taltalawatawam ti sango ti apartment. Saanka a makaidna. Agragragutok ti barukongmo. Madanaganka. No manen umangeska iti nauneg. Nakaun-uneg. Pagnaka a pagna. Saanmo a mapagsimbeng ti riknam.
“Maulawakon a mangbuybuya kenka, dude,” inyanawa ni Dindo kenka.
Nagsardengka iti sango ni Dindo a nakatugaw. Kinueliom sa pinatakdermo.
“Wooo... Wooo... what are you doing? Saanakon a makaanges,” kinuna ni Dindo a nagkayaw-at ket inibbatam.
NOBELA: Saan a Rosas Amin nga Ayat, Maria Emmanuelle (19)
“I haven’t done this, dude,” inyarasaasmo.
Minulagatannaka ni Dindo. “Ania ti kayatmo a sawen?”
“Diak pay napadasan ti naki-date,” agar-arasaaska pay laeng.
Nakapigpigsa ti katawa ni Dindo.
“What’s so funny?”
“Ket apay nga agar-arasaaska?” Agkatkatawa pay laeng ni Dindo.
“It’s embarassing...”
“Talaga a nakababain!” Napigpigsan ti katawa ni Dindo.
“Ania ti nakababain?” Nakigtotkayo iti panagtimek ni Mama Lupe. Liningaymo ti naggapuan ti timek. Umas-asidegen ni Mama Lupe kadakayo. “A-awan, mama,” sipapardaska a simmungbat.
“Mom, adda date-na. Ngem saanna kano pay a napadasan ti naki-date.” Imlek manen ni Dindo.
Limmabbasiten ti rupam.
“Dindo, stop it,” makaungeten ni Mama Lupe.
“Mom, eighteen-nan. Uray naminsan laeng, di pay nakanobia, di pay naki-date.” Tinaliawnaka ni Dindo. Sa kinelkel iti katawa.
“Isardengmon dayta,” inyawana ni Mama Lupe ken ni Dindo. “Saan a nakababain dayta. Ken sabali ni Ferdie, saan a kas kenka. Makakitaka laeng iti magustuam a babai, kunam la no agkuerongkan no saanmo a mai-date.”
“Mom!”
Sinangonaka ni Mama Lupe. “Napintas kadi?”
Saanka a nakuni.
“Napintas, mom! Isun sa ti kapintasan iti Las Vegas High,” insallawat ni Dindo. “Ngem nakapuy ni Ferdie. Crush-da la ngaruden, dina ketdin ammo ti aramidenna.”
“Saanmo a dengdenggen ni Dindo, Ferdie. Ala, inka i-date ni... Ania itayen ti naganna?”
“Rhianna...” insungbatmo.
“Sige, ipasiarmo ni Rhianna. Dika agdanag. Agbalinka laeng a gentleman, ammomton ti aramidem. Ngem saanka nga umin-inum iti arak, okey?”
Nagtung-edka. “Okey, mama...”
“Adda kuartam?”
Kinutim dagiti abagam.
Napan innala ni Mama Lupe ti bagna iti lamisaan. Adda kinautna iti petakana sa nagsubli met laeng iti yanmo.
“Alaem daytoy ta adda usarem no kasapulam,” kinunana sa impadakulapna kenka ti nakupin a kuarta.
Minatmatam ni Mama Lupe ngem ti ladawan ti inam ti nakitam. Sangapulo ken liman a tawen ti napalabas ngem nalangto latta ti lagipmo kenkuana. Bimmato ti pusom, timmangken ti riknam kadagiti nagkaadu a didigra a simmangbay iti biagmo sipud impadawatnaka ti inam, ngem malaglagipmo latta ti inam. Saannaka nga impateg. Ngem kailiwmo latta.
Dimo napupuotan ti panagubbog dagiti matam.
Nasingakayo iti napigsa a bosina. Ammom lattan a ni Rhianna. Nagkikinnitakayo a tallo.
“Gracias, mama, gracias...” nayesngawmo. Pinunasmo dagiti luam sa nagturongkan iti ridaw.
MAGMAGNADA iti nailet a pasilio ti hotel. Kasla agam-ampayag pay laeng ti rikna ni Leilani kalpasan ti naimballigian a pannagnana iti runway. Dandani isuna ti nakaiturongan amin a panagkita dagiti tattao. Dinaydayawda ti kinapintasna. Ti naidumduma a garawna. Ti kinapigsa ti batombalanina a mangguyod kadagiti agbuya. Maysamaysa mayat a makisarita kenkuana. Kiniddawda a ma-interview. Ngem ni Vhong ti nangeddeng iti dayta. Awan ti inawatda a kiddaw.
Nakaaklili ni Leilani iti takiag ni Vhong. Pinilida ti rummuar iti likudan ti hotel ta adu dagiti reporter ken retratista nga agur-uray kadakuada iti sango. Pinaunan ni Vhong ti driver-na a mapan nangala iti luganda ket sabten daytoy ida iti likud.
Naginad ti pagnada. Aglaplapusanan ti ragsak ni Leilani. Makais-isem. Dina mailawlawag ti riknana.
“Thank you, Vhong... thank you for everything,” kinuna ni Leilani. Inrakusna ti takiagna iti siket ni Vhong.
“Iti ania a gapu?” sinaludsod ni Vhong.
“Iti panangtulongmo kaniak. Kadagiti an-anusmo kaniak. No saan a gapu kenka, diak koma maragpat daytoy a balligi.”
“Ah, sika ti kangrunaan a nakaigapu iti dayta. Talaga a natural ti talent-mo. And this is just the beginning. Inton bigat, kadagiti pagiwarnak, makitamto ti ladawam a mangitangtangsit kenka, ti pintas dagiti komentarioda iti talentom.”
“Wow! Talaga nga adu ti utangko kenka. Ngem saan a bale, agsubadakto.”
“Saanmo a panunoten dayta.”
Nagsardengda iti ridaw. Timmammidaw ni Vhong iti nagtimbukel a bassit a sarming iti ridaw. Kinitana no agur-urayen ti luganna. Awan pay. Awan ti matagtagitao. Impalawlawna ti panagkitana. Masiguradona nga awan ti sabali a tao.
Inlukat ni Vhong ti ridaw. Sinabat ida ti nasalimuot a pul-oy. Tumanaliaw latta ni Vhong iti aglawlaw.
Nakadlaw ni Leilani. “Apay? Adda kadi sapsapulem?” sinaludsodna.
Nagwingiwing ni Vhong. “Dagiti paparazzi. Uray ditoy Filipinas, adudan. Diak kayat a makitadata.”
“Oh,” nayesngaw ni Leilani. “Kunak no ania itayen. Ngem naragsakak, Vhong... naragsakak.”
“Kasta met kaniak. Nagun-odmo met laengen ti tartarigagayam a panagbalinmo a runway model. Adu ti nagraem kenka. Madamdama, nalatakkanton.”
“Gapu kenka.” Immarakup ni Leilani ken ni Vhong. Indingpilna dagiti bibigna kadagiti bibig ti lalaki. Sinubadan ni Vhong ti agekna.
Pagam-ammuan ta adda naggilap. Nakalawlawag a gilap. Kellaat nga inakkal ni Vhong dagiti bibigna kadagiti bibig ni Leilani. Kimmitada a dua iti naggapuan ti gilap. Naipasabat kadagiti matada dagiti makauram nga spotlight dagiti kamera.
“Vhong, girlfriend mo ba siya? Straight ka ba talaga?” impukkaw ti maysa kadagiti paparazzi.
TI laeng bulan— a kabus ita— ti mangsilsilaw kadakayo iti bakras ti pangngatuen a paset ti Sunrise Mountain iti amianan ti Las Vegas. Awan ti mangsingsinga iti nakaul-ulimek nga aglawlaw malaksid iti karasakas dagiti bulong nga apirasen ti sagpaminsan nga umappayaw nga apagsalemsem nga angin, ti kanta dagiti insekto iti bantay, ken ti kellaat a panagungor dagiti pakigubat nga eroplano nga agtayab manipud iti Nellis Air Force Base nga adda laeng iti saan unay nga adayo. Ayuyang dagiti agayan-ayat daytoy a lugar ngem iti daytoy a rabii, limlima laeng a karro wenno kotse ti nakaparada.
Addakayo iti akin-igid a pagparkingan, iti masungad dagiti agsangpet a lugan. Nagabaykayo ken Rhianna a nakatugaw iti hood ti topdown a Ford Mustang ket nagdennes dagiti takiagyo. Buybuyaenyo ti pakabuklan ti Las Vegas. Kasla pegpeg a balitok dagiti ginasgasut a ribu a bombilia a mangranraniag iti sibubukel a siudad. Wow! naisawangmo itay kasangsangpetyo ken makitam ti kinapintas ti buya iti adayo. Ita laeng nga umayka ditoy.
“Kanayon kadi a kastoy ti kinaulimekmo?” pagam-ammuan ta sinaludsod ni Rhianna.
“S-sorry,” insungbatmo. Saanmo a tinaliaw ni Rhianna gapu ta dimo kayat a marupsa ti nabatbati pay a kiredmo. Limmingayka ketdi iti kanawan, iti matantannawaganyo a Nellis Air Force Base. Nakaranraniag ti base. Madama siguro ti training-da.
Napaisem ni Rhianna. “Talaga a naidumdumaka, Ferdie...” kinunana.
Liningaymo ni Rhianna. “Apay? Gapu ta sabsabaliak a puli? A saanak a kas kadagiti kabunggoyam a puraw?”
Apagasngaw ti katawa ni Rhianna. “No, no! Saan a kasta ti kayatko a sawen. Who cares no Filipino-ka? I like Filipinos.”
Awan manen ni maisaom. Umuna, dimo ammo no ania ti ibagam. Maikadua, ita laeng a maki-date-ka. Maikatlo, dimo ammo ti aramidem.
Maymaysa ti siguradom. Nasiludnakan ti kinapintas ni Rhianna.
“Ti kayatko a sawen, naidumdumaka. Narespetoka. Nadayawka. Saan a mananggundaway a kas kadagiti adu a lallaki dita.”
Dimo nagawidan ti immisem.
“Dayta man! Nakitaka met laengen nga immisem.”
“Dinak am-ammo, Rhianna...” Naamirismo nga ita laeng a binalikasmo ti nagan ni Rhianna.
“Filipinoka, dandanin makatawen nga addaka ditoy, nasinged a gayyemmo ni Dindo, agnaedka kadakuada, player-ka iti football, nalaing... ken no ad-adda pay nga ipasnekmo ti agay-ayam, saan nga adayo a makaalaka iti scholarship-mo nga agtuloy iti kolehio. Awan pay nobiam. Adda kadi pay saanko nga ammo maipanggep kenka?”
Nabatika a mangmatmatmat lattan ken ni Rhianna.
“You know I like you...”
Imbaliwmo ti panagkitam. Nakatugawka ngem kasla agluloken dagiti tumengmo.
“Ngem ti nakakaskasdaaw kenka, kasla kayatmo pay ti umadayo kaniak. Kaaduanna kadagiti lallaki nga am-ammok, no maikkanda iti gundaway a kastoy, nakadurdursokda. Awan ti panagaripapada. Kunam no maysaak a makan a kayatda a lamuten... Ngem kas man la awan ti panaginteresmo kaniak....”
Saanka latta a nakauni.
“You don’t like me?” Deretso a saludsod. “You don’t see me attractive? Come on, Ferdie, say something....”
Apagisu nga ungapem dagiti bibigmo idi umkis ti maysa a jet a pakigubat a nag-take-off iti base. Binuyam ti jet a kimmalay-at iti tangatang… ti maipugpugso nga apuy manipud iti ipus daytoy, agingga a nagpukaw iti law-ang.
Simngat manen ti makatitileng nga ulimek.
“If you don’t like me, it’s okay. You can tell me.”
Immangeska iti nakaun-uneg. “I like you, Rhianna,” dimo ammo no naggapuan dagita a balikas nga arintigergeren a rimkuas kadagiti bibigmo.
“Really?” kasla saan a mamati iti ragsakna ni Rhianna. Sinangonaka nga inarakup sa inarakusna ti takiagna iti siketmo. Pumudot ta pumudot lattan ti riknam nupay nadlawmo itay a lumamiis a lumamiisen ti angin.
Sinubadam ti arakup ni Rhianna. Anian a naglamuyot ti bagi ti balasang! Mariknam unay ti pudot nga irukrukuas ti barukongna iti barukongmo. Sinapul dagiti bibigmo dagiti bibigna. Sumriamen dagiti dutdotmo nga ad-adda pay a pinagungar ti sang-awna. Saanmon a mailawlawag ti riknam. Ti laengen ammom, awan ti sabali pay a parsua iti daytoy a lubong. Dakayo laengen a dua ken Rhianna.
Ngem pagam-ammuan la ta adda nadagsen a dakulap a nagdisso iti abagam. Naklaatka ket naladawen tapno makakutika pay. Naiguyodka. Nagsasaruno a danog ken kugtar ti nagdisso iti bagim. Lima dagiti mangkabkabil kenka. Ken dadakkelda. Dimo ammo no asino ti sanguem. Madamdama pay, dua ti nangtengngel kenka.
“Ania ti imballaagko kenka, Ferdie?” inyikkis ni Walter iti rupam. Napalaus ti pungtotna.
(Maituloyto)
