Pormal nga impila ni House Committee on Appropriations Chairperson Nueva Ecija 1st district Rep. Mikaela Angela Suansing ti 2027 General Appropriations Bill (GAB) wenno ti singasing a badiet para iti 2027 nga aggatad iti ₱7.2 a trilion.
Naipila ti singasing a badiet iti Kamara idi Agosto 26 kas House Bill (HB) No. 10858, manipud iti 2027 National Expenditure Program (NEP) nga indatag ti Malakanyang.
Daytoy ti pannakairugi iti panagsasarita ti nadumaduma a komite mainaig iti badiet.
Segun iti Department of Budget and Management (DBM), ti Department of Education (DepEd) kadakkelan iti badiet, nga aggatad iti ₱976 billion; sumaruno ti Department of Public Works and Highways (DPWH) nga addaan iti ₱644 billion a badiet (mairaman ti nasurok a ₱100 a bilion para iti flood control); Health Sector (Department of Health [DOH] ken PhilHealth), ₱353.8 a bilion; Department of the Interior and Local Government, ₱332.5 a bilion; Department of National Defense, ₱328.8 a bilion; Transport Sector, ₱302.2 a bilion; Agriculture Sector, ₱261.7 a bilion, Department of Social Welfare and Development (DSWD), ₱241.6 a bilion; State Universities and Colleges (SUCs), ₱176.5 bilion; ken ti Hudikatura, ₱86.3 a bilion.
Ti GAB, nga agdalan met iti panangtingiting ti Senado, ti kapatgan a paglintegan a tinawen a masapul nga ipasa ti Kongreso.
Dati nga editor ti Bannawag, padayawan ti KWF
Inkari da Suansing, Majority Leader Ilocos Norte 1st district Rep. Sandro Marcos, ken House Speaker Isabela 6th district Rep. Faustino "Bojie" Dy nga ipakatda amin a reporma a naipatungpal iti badiet idi napan a tawen. (Ellson Quismorio/Manila Bulletin//Lito Hilidon/Bannawag)
