Sarita ni ESMENIO GALERA
MALEM ti Sabado. Nairana a nagpasiar ni Mr. Richard Dee, ti akinkua iti pasdek a patpatakderenmi. Nauyong ni Mr.Dee. Awan ti iisemanna. Mabain pay ni Manong Andro a makisango. Agmaymaysa no agpasiar. Nakarubuatakon nga agawid.
Nagsabatkami.
“Good afternoon, sir,” inkablaawko.
Kinusilapannak ketdi ket intuloyna ti immuli.
KLASIKO A SARITA: Tarindanum (3)
Nasakit ti nakemko iti saanna a panangitaltalek kaniak. Inurayko ti yuulogna.
“May I disturb you, sir?” kinunak apaman a nakaasideg.
“Bakit?” nanglabbaga.
“May I have the honor to extend my hand…” Inyawatko a dagus ti dakulapko. Inawatna met ngem nadlawko ti panagdanagna. Inyam-ammok ti bagik: nagan, taeng, lugar a nakayanakan, nagadalan, inadal, ken agdama a trabahok.
“Ita, ania problemam?”kinunana ket nagna manen.
Binayabayko.
“Nagturposak iti kolehio, sir. Kayatko koma ti maaddaan iti nasaysayaat nga akem iti trabahok ita. Ammok nga adda akem a maited kaniak. Dakayo ti pangulo ditoy. Namnamaek a matulongandak.”
Sinangonak. Dinamagna no kaano ti panangrugik a nagpeon. Kalpasanna, imbagana nga agsuratak iti aplikasion nga itedko ken ni Inheniero Garcia, ti project engineer.
“Kastoykayo kadi amin nga Ilokano?” dinamagna.
“Wen, sir, dakami a nairuam iti rigat.”
Napalalo nga is-isemko idi agsinakami.
NAAMMUAN ti amin ti inaramidko. Kalpasan ti maysa nga aldaw, daydi a panangumsi, nagbalinen a panagdayaw. Agdinamagen ti pannakaidestinok iti maysa nga opisina a kukua ni Mr. Dee nupay diak pay nakaawat iti pakaammo. Ngem pimmayso dayta a sayangguseng!
Dinayawko ni Manong Andro. Makais-isemak no malagipko. Deadalak gayam ket adda karbengak nga agpanunot. Ta iti baet ti rigatko, adda gayam nam-ay nga agur-ay kaniak iti kompania a pagtrabahuanna.—O
