Nobela ni NORBERTO D. BUMANGLAG, JR.

NAKATUGAW nga agmaymaysa iti bassit a lamisaan iti bassit a kuarto. Iti sangona, adda one-way mirror. Ammona nga adda mangbuybuya kenkuana dita. No apay nga adda ditoy, mariribukan pay laeng.

Nagdumog iti lamisaan. Kellaat a naulaw. Kasla agalimbadaw. Kasla sinulnot ti nagkakamang a tubo ti pakabuklanna…

Nakapigpigsa tiungor ti Black Hawk a helicopter a nakaparpardas nga agpababa. Maur-uram ti nadadaelen a rotor daytoy iti likud.

“Mayday! Mayday!” inradio ti piloto.

Sumanengseng dagiti bala ti AK-47 a naggapu iti nagduduma a direksion manipud iti baba. Kumanaltiing met dagiti kapsula nga aggapu iti M60E4 a machine gun iti saan nga agsarday a panagpaltog ti gunner-da kadagiti kabusor iti baba.

Agiikkisda amin a naglugan iti helikopter nangnangruna ken ni Lt. Presley, ti kakaisuna a babai iti team-da. Nagsaganada iti crash landing, ngem agik-ikkis latta ti babai.

“Lieutenant! Calm down! Lieutenant!” inriawna iti kaduada a babai.

“We all gonna die! We all gonna die,” inyikkis ni Lt. Presley nga insangit.

“Teniente!” ginammatanna ti agsumbangir nga abaga ti babai sa yinugyogna.  “No one is gonna die! Understand? No one!”

Nanabtuog a nagdisso ti helikopter. Naipugso ti makapleng a kanalbuong ken makasisirap a lawag. Nalidem ti amin a makitana. Agas-asuk ti kasla maysan a  rurog a Black Hawk. Nakitana ti sumagmamano a naiwarang a kaduana iti asideg ti helikopter. Timmakder. Awan ti mariknana, uray no nadigos iti bukodna a dara.

“Lieutenant Villa! Lieutenant Villa, take cover!” kasla am-ammangaw ti pannakangngegma iti ikkis ti koronelna. Ngem saan a nangipangag. Timmakder uray no saan nga agressat ti kumanalbuong a panagbusi dagiti paltog. Binagkatna ti maysa a soldado. Impanna iti natalged a disso. Sa tinarayna manen ti maysa. Sa maysa manen. Tallo. Uppat.

“Lieutenant Villa, help!” naitubong ti napigsa a timek ni Lt. Presley iti lapayagna.

Timmaliaw. Nakitana ni Lt. Presley a napandagan iti paset ti nadadael a helikopter. Natikaw. Itarayna iti natalged a disso ti baklayna a kaduada ket sublianna ni Lt. Presley? Intuloyna ti timmaray. Sa sinublianna ni Lt. Presley. Ngem nakapuyen. Pinilitna latta ti nagna. Pagam-ammuam ta nakarikna iti napudot a banag a simmari iti barukongna. Nakusbo…

Intangwana ti rupana. Nagsung-ab. Limmang-ab iti nabuslon nga angin a pangallangonna iti angesna.

Kasla nakalawlawag manen iti panunotna daydi a pasamak. Nasab-itan iti Purple Heart Medal. Dina ammo no ania dagiti simmaruno a napasamak. Ngem kunada a lima ti nakalasat, lima met ti natay a kakaduana. Awan panagduaduana, ni Lt. Presley ti maysa kadagitoy. Ket agingga ita, al-alia a dina pulos maitarayan ti napasamak.

Nagdumog manen. Ket pilit a linagipna dagiti napasamak sakbay a nakadanon iti daytoy a kuarto…

DIMTENG iti balayda. Linukatanna ti ridawda. Impalawlawna ti panagkitana a kasla adda sapsapulenna. Kanayon nga aramidenna dayta no sumangpet. Narigat ti di agannad. Naulimek iti uneg ti balay malaksid iti danarudor ti AC iti ruar. Agsalsala a kasla asuk ti angin nga ipugpugso ti exhaust fan. Simrek. Inrikepna ti ridaw. Nariknana a dagus ti lamiis. Kasungani ti kinapudot, a dinegdegan pay ti nangato a humidity, iti ruar. Agnaedda ken Remy iti asideg ti desierto iti Camp Pendleton, California, maysa kadagiti kadakkelan a US Marine Base iti America.

Tinaldiapanna ti relo iti diding; ala unan iti malem. Nagturong iti kosina.

Iti kinaulimek ti balay, ipapanna a matmaturog ni Remy iti ngato. Alas kuatron itay simmangpet daytoy itay agsapa. Maysa a nurse, agtrabaho iti military hospital. Dina kayat a singaen ti naimas a turog daytoy. Sa maysa, naibagana itay sumrek iti trabahona a marabiyan a sumangpet ta mapanda koma agiinum kadagiti ka-squadron-na. Kayatna nga agtitiponda ta maudin daytoy nga aldawna iti US Marine Corps. Nalpasen ti misionda idiay Iraq. Dina metten kayat ti agsubli iti Afghanistan, isu a pinilina nga in-resign ti komisionna nga opisial kalpasan ti nasurok a walo a tawenna iti serbisio.

Inuyosna ti desert comouflage nga unipormena. Inwagsakna sa imbatona iti sopa iti salas. Nagturong iti refrigerator. Linukatanna sa nanglengnges iti Corona a serbesa. Linukatanna, nagturong iti den, intangguapna ti serbesa, pinidutna ti remote control, biagenna koma ti TV ngem nagbabawi; impusotna ketdi ti bagina iti sopa. Timpliak ti serbesa iti pantalonna ket napa-shit a nangtimpag iti nabasa a pantalonna.

Timmakder. Timmamdag iti tawa. Nasulek ti imatangna iti kaarrubana a nakauniporme a kas Marine; agturong daytoy iti luganna.

Nariknana ti kasla pannakauyos ti angesna. Liningayna ti unipormena iti sopa. Mariknana lattan ti panagkutukot dagiti tumengna. Isu pay laeng ti ikukutukot iti panunotna no ania itan ti aramidenna. Nagikkat iti Marine nga awan man laeng ti planona. Uray no kinaam-amakna ti tunggal kanito a kaaddana iti serbisio, nagbalin met daytoy a paset ti biagna. Maymaysa laeng ti adda iti panunotna, dina kayat a maipada ti biagna iti nagbalin a nariribuk a biag dagiti dadakkelna.

Ket umagibas manen kenkuana ti semsem ken gura iti pannakalagipna kadagiti nagannak kenkuana, kadagiti adu a nagkuranganda kenkuana. Agpadpada dagitoy a nangisubsob iti bagbagida iti trabahoda gapu iti maymaysa laeng a rason: ti makaaon iti nakayanakanda a kinakurapay idiay Filipinas. Kayat dagitoy nga agbalbaliw ti biagda. Kayat dagitoy nga ipaayan iti nasaysayaat a masakbayan. Dida kano kayat a maitulad kadakuada a nalalais gapu iti kinapanglaw ti biagda iti Filipinas. Inkarida a saan a maulit dayta a biagda iti America.

Apresiarenna dayta nga arapaapda para kenkuana. Ngem impaidamda met kenkuana ti pagrebbenganda a kas nagannak. Ken nagsisina ti lubongda.  Ti inana, nabati iti Hawaii, iti isla ti Oahu. Ti amana, naisadsad iti Las Vegas, siudad a nagpupuniponan ti amin a kita ti panagbasol. Isuna, simrek iti US Marine. Saan a gapu iti ayatna a mangsaluad iti patinayon a panagwaywayas ti America, wenno iti itutulongna iti lubong a mangsalaknib kadagiti mairurumen nga umili iti ima dagiti nadangkok a diktador. Simrek iti serbisio ta kayatna laeng ti maipusing iti nariribuk a biag dagiti nagannak kenkuana.

Agsubli koman iti sopa idi naibuang iti lapayagna ti magaggagaran nga anangsab ken areng-eng. Nakigtot. Nagallingag. Aggapu iti ngato?

Napan iti sakaanan ti agdan. Timmangad. Pimmigsa ti areng-eng. Nariknana ti panagkikinnamat dagiti angesna, babassit nga anges a nagin-inut a dimmadakkel. Agbitekbiteken iti napigsa ti barukongna. Saggatlo a pangal nga inaskawna ti agdan a nagpangato. Pumigpigsa met ti anangsab ken ranitrit ti kama.

Iti apagkimat, addan iti siudad ti Fallujah iti Iraq. Iti kangitingitan ti house-to-house search kadagiti enemy combatants, iti maysa a balay a sinerrekna, nangngegna ti ikkis ti maysa a babai, ti ranitrit ti kama, ti katawa ti maysa a lalaki. Kinugtaranna ti ridaw; naipasabat kenkuana ti kapadpadana a US Marine, nakababa ti pantalonna, ken nakarabaw iti agik-ikkis a babai. Maysa a naganus a balasang.

“Corporal!” inyikkisna.

Saan a dimngeg ti lalaki. Kasla napukawen ti ulona iti rabaw ti babai. Nagsabat dagiti matada iti babai nga Iraqi. Nalmes iti lua daytoy. Agpakpakaasi. Agik-ikkis.

Agtigtigerger dagiti imana a nanggutta iti kuelio ti uniporme ti korporal. Naltotan ti korporal iti pannakaet-et ti tengngedna, imbaltogna iti datar. Ginammatanna ti ules iti kama, impuruakna iti babai sa inseniasna a pumanaw. Sipapardas ti babai nga agsangsangit a timmaray a rimmuar iti kuarto. Agtigtigerger pay laeng a nangsango iti korporal. Inasutna ti 9MIL-na, inkasana sa impaturongna iti ulo ti korporal.

Saan a nagun-uni ti korporal. Sibubuteng a nangsallukob iti ulona a kasla nangaklonen iti gasatna. Pagam-ammuan, bimtak ti makatitileng a bomba. Nagunggon ti kongkreto a balay sa nagsasaganad ti kanalbuong dagiti nagduduma a busi ti paltog.

“John, no... John, please... no,” kasla naglawag ti panunotna iti makatitileng nga ikkis ni Remy. Addan iti kuartoda ken Remy. Agsangsangit, silalamolamo daytoy a siaarakup kenkuana.

Umanal-al. Agkebbakebba. Agdardara ti gemgemna. Iti datar, naudatal ti maysa a lamolamo a lalaki. Agdardara ti rupana. No ania ti napasamak, dina matandaanan. Agbaybayo pay laeng ti barukongna.

“John!” saning-i manen ni Remy.

Nagtugaw. Dadakkel latta dagiti agkikinnamat nga angesna. Kinagatna dagiti bibigna. Nagareng-eng ti lalaki a mangikarkarigatan a tumakder.

Timmakder. Agtigtigerger dagiti takiagna. Immasideg iti Puraw a lamolamo ken daradara. Nagatras ti Puraw a nangikuros kadagiti takiagna iti rupana. Agkinkintayeg ti lalaki. Am-ammona daytoy. Ni Ricky. Kaduana iti U.S. Marine. Maysa a Major.

“John… Please leave him alone!”

Naggilap manen a nagsubli iti panunotna iti siudad ti Fallujah. Dumalugudog dagiti agsasaruno a kanalbuong iti aglawlaw. Matimudna pay ti sayengseng dagiti bala nga aglabas. Iti sangona, agtigtigerger ti korporal. Nakadeppel ti paltogna iti ulo daytoy. Nayugyog manen ti kongkreto a balay, ket mangrugin a malusdoy. Ginammatanna ti korporal.

“Move, Corporal!” inriawna sa ginuyodna daytoy ket nagdardarasda a rimmuar iti maur-uram ken marmarpuogen a balay.

“John, please…!” naitubong manen iti lapayagna ti sangit ni Remy.

Immanges iti nauneg. Nagin-inut a nagkalma ti angesna. Imbabana ti takiagna. Nakakuros pay laeng ti takiag ti lalaki iti rupana. Minatmatanna ni Remy a nakatakder iti sangona. Nagkidem iti pannakaamirisna a silalamolamo daytoy. Ginaw-atna ti roba iti rabaw ti kama sa imbatona ken ni Remy.

Minatamatanna ni Remy a mangibungbungonen iti roba iti bagina.  Mapugsapugsaten ti saning-i daytoy. Nagsabat dagiti matada. Iti likudan dagiti kayumangi a bukel ti mata daytoy, nayurit ti gumawgawawa nga araraw. Napnuan saem.

Naggunay dagiti bibigna, ngem awan ti simngaw a balikas. Inyaprosna ketdi ti dakulapna iti aglingling-et a rupana.

Nagpusipos; nagturong iti ridaw. Inlibagna nga inrikep apaman a nakaruar. Nagkidem iti pannakadanonna iti lulonan ti maudi a pangal ti agdan. Ket addayta manen ti rupa ti korporal a nangrames iti babai nga Iraqi. Nagin-inut a nangmesmes. Ket nariknana manen ti rurodna iti bagina. Saan a nainkalintegan ti inaramidna.

Binaybay-anna ti korporal iti inaramid daytoy. Dina inreport iti commanding officer-na. Ket naikupin a kasla awan aniamanna ti napasamak. Ngem nagbalin dayta a rurog ti konsensiana, a nangmantsa iti naindaklan a serbisiona iti US Marine. Ket ni Korporal Patrick Sanders a nangrames iti balasang nga Iraqi, nagbalin a decorated war hero iti tay-ak ti paggugubatan iti Iraq ken Afghanistan.

Immulog. Pinidutna ti unipormena, insuotna sa pinunasanna dagiti dara ni Ricky iti imana. Rimmuar. Nangngegna ti nakapuy a panangawag kenkuana ni Remy.

Simmalpa iti Hummer H2 a luganna. Intawwekna ti tulbek iti tutulbekan sa pinaandarna ti lugan. Makapleng ti naikkis ken makapatigerger nga ungor a naggapu iti na-revised a Magna Flow Specialty Race Mufflers ti Hummer.  Pinaddakanna nga insagad iti datar ti siliniador, imkis ti lugan iti panaganit-it dagiti 24-inch nga akaba a ligay a nangibati iti puraw nga asuk ken nangisit a naguyasan ti goma.

Simrek iti H5 freeway ket ad-addan a simyag ti luganna a nakitipon iti mangrugin nga agpuskol a trapiko. Kasla nagdait iti freeway iti nasukansukat a lane a linasatna. Nakaparpardas ti panagpatarayna. Awan iti bukodna a panunotna. Maymaysa laeng ti mariknana. Umap-apuy a pungtot. Kayatna ti umadayo. Ngem papananna? Awan ti mabalinna a paglemmengan. Ta ammona a saannanto a maitarayan ti napait a lagip a gapu ti nagsinaan dagiti nagannak kenkuana. Sa itan, nadadael metten iti bukodna a biag.

Dina ammon no mano a milia ti nadaliasatna. Alawaaw ti panunotna iti napegges a panangpampanurnorna iti freeway. Awan iti puotna a sumagmamanon a minuto a sursuroten ti California Highway Patrol. Um-umkis ti sirena a mangip-ipus kenkuana.

“Driver in the Black Hummer, pull over...! Driver in the Black Hummer, pull over!” nagallangogan ti loud speaker a naggapu iti California Highway Patrol.

Uray no um-umkis ti muffler ti luganna, nabatad a nangngegna dayta a timek. Liningayna ti back mirror ket naipasabat kadagiti matana ti nalabaga nga aggilapgilap a silaw iti ngato ti lugan ti California Highway Patrol. Inalay-ayanna ti dapanna iti siliniador, nag-signal nga agpaigid.  Nagsardeng iti emergency lane service ti freeway.

“Driver... stay inside...  Raise both hands where I could see them!” imbilin ti polis bayat ti yaasideg daytoy iti ‘yanna, nakaasut daytoy iti paltogna.

Inngatona dagiti dua nga imana.

Nailukat ti ridaw ti Hummer.

“Slowly get off the car... no sudden moves!” naturay latta ti timek ti patrolman.

In-inayad a dimsaag a nakangato pay laeng dagiti imana.

“Did you know how fast you were driving, Capt?” nadayawen ti timek ti polis iti pannakailasin daytoy nga opisial iti US Marine.

“So fast, officer,” insungbatna. “And I’m sorry...”

“One hundred miles an hour... too dangerous, Capt. Have you been drinking?” Intammidaw ti polis ti ulona iti uneg ti driver side ti Hummer. Sa insublat daytoy ti likud. Kalpasanna, inangot daytoy.

“Half a bottle of beer, officer...”

“Not enough to cloud your judgement... Rush of adrenalin, Capt?” Timmallikud ti patrolman ket idi agsubli, iggemnan ti breathalyzer. “Standard procedure, Capt. You can refuse but I have to arrest you and take you to the precinct for blood alcohol content test.”

Saan a simmungbat. Immanges iti nauneg sa nagpug-aw iti breathalyzer. Kinita ti patrolman ti nakarekord a numero: .02%. Immisem. Maibilang a DUI no ti blood alcohol content ket .08%.

“I’m giving you a break this time, Capt. Ipagpagapuk laeng iti panagraemko iti panagserbim iti pagiliam. Ngem no addanto pay sumaruno, I’ll fine you to the extent of the law.”  Immisem ti polis ket inyawatna ti tiket. “Slow down, and drive carefully.”

Timmallikuden ti polis.

Immanges iti nauneg. Kinitana ti tiketna. Speeding ticket. Nailanad laeng a simmobra iti sangapulo a milia ti panagpatarayna imbes a tallopulo a milia. Nagsubli iti luganna. Insadagna dagiti imana iti manibela. Imbakalna ti panagkitana iti agsumbangir a kabambantayan a nawatiwat a freeway. Dina ammo no sadino ti papananna.

Nagkidem. Ket nagalintatao ti rupa ni Remy. Saan a ti Remy nga adda iti sidong ti sabali a lalaki no di ket ti Remy nga iti damo pay laeng a nakitana, nakuldingen ti pusona. Ti ninamnamana a babai nga ikallaysana.

Manon a tawen nga agayan-ayatda? Liman a tawen. Sangkarengreng ni Remy no apay nga agingga ita ket agayan-ayatda laeng iti laksid nga agdendennadan. Namin-adun a pinennek daytoy no talaga met laeng nga ay-ayatenna. Ken no apay nga iti las-ud ti lima a tawen, awan pay ti engagement ring-da.

Ania ti rasonna? Saan pay a nakasagana. Agpapaay iti serbisio, agsinsinnublat ti Iraq ken Afghanistan a pakaideployanna. Napeggad unay dagiti asignment-na ket dina kayat a mabalo a dagus ni Remy. Ngem inulbodna ni Remy. Ammona, masiguradona, nga iti uray kaano man, saanto a nakasagana a makikallaysa. Dina kayat a mapasamak kenkuana ti nasaksianna a nalaad a matrimonio dagiti nagannak kenkuana.

Ngem ay-ayatenna ti balasang. Ket pinatangkenna ti pakinakemna. Inturedna ti nangiparintumeng iti sakaanan ni Remy a nangkiddaw iti panangikallaysa daytoy kenkuana. Napalaus ti ragsak ni Remy a nangawat ken nangisuot iti engagement ring nga inyawatna. Pinilina ti Pebrero 14 a panagkasarda. Aldaw dagiti Puso.

Nagtulaganda ti panagnaed ni Remy iti balayna. Idi damo, anian a ragsakda. Ket impapanna nga agtalinaed a kasta agingga iti panagkasarda, ken iti agnanayon kalpasan dayta. Ngem nagbiddut. Sumagmamano laeng a bulan a panagdennada, nagin-inut a nagbaliw ti riknana. Dina ammo no apay. Kasla sinalipengpengan ti buteng.

Bimmaaw. Agingga a nain-inut a nayadayo kenkuana ni Remy. Nga isu ngata ti nakaitundaan ti sabali a lalaki iti bukodda a kuarto.

Nagkidem. Ngem ti ladawan dagiti nagannak kenkuana ti nagalintatao iti panunotna. Nalangto latta iti lagipna dagiti saan nga agsarday panagap-apa dagitoy ken ti panangbabbabalaw ti tungal maysa kadakuada kadagiti nagbiddutanda. Agpadada a natangig, awan mayat nga agpakumbaba. Walo a tawenen a dina nakita ida. Ngem kayatna nga agtalinaed a kasta. Kayatna a mawayawayaan ti panunotna kadagiti nalalaad a lagip.

Pinagandarna ti luganna. Nagbuelta. Nainayaden ti panagpatarayna a nagsubli iti balayna.

Nagtarusanna a napan linukatan ti drawer ti tokadorna. Pinidutna ti Glock .45 caliber agraman dagiti nakakahon pay laeng a bala. Inkabilna iti maletana.  Iserrana koman ti drawer ngem iti lansad daytoy, nailansa ti panagkitana kadagiti sumagmamano a di pay nalukatan a surat a naggapu iti amana. Awan ti gagarna a makaammo iti no ania man a mapaspasamak iti amana wenno iti ania man a kayatna nga ibaga wenno ipadamag daytoy. Ad-adda a natalinaay ti biagna no awan ti maammuanna a mapaspasamak iti amana. Ngem minuttalenganna dagiti sobre. Ket kamaudiananna, pinidutna nga impuruak iti maleta.

Naipayagsaw ti maysa a retrato. Minatmatanna. Retratoda ken Remy. Kasano a malipatanna dayta a buya? Nagbakasionda iti Las Vegas, iti revolving restaurant iti tuktok ti Stratosphere Tower Hotel & Casino a mangtantannawag iti nalayus iti lawag a siudad. Nakaparintumeng a nakaiggem iti diamond ring. Anian a sam-it ti isem ni Remy a pinaneknekan ti immuneg a kallidna. Inapirasna ti bibig ni Remy iti retrato sa impaklebna iti tokador.

Ginammatanna ti maudi a lupotna, inselselna iti maleta sa insiperna. Binitbitna ti maleta sa nagna a nagturong iti ridaw. Ngem nagsardeng. Nagpusipos. Nadlawna a naurnosen ti kuarto nga awan man laeng ti naibati a tugot ti riribuk a napasamak iti sumagmamano laeng nga oras a napalabas. Nagbalin daytoy a kuarto a paraiso ti ayan-ayatda ken Remy, a nagbalin nga impierno iti kamaudiananna. Immanges iti nauneg. Rimmuar ket inrikepna ti ridaw.

Immulog. Nagtarus iti salas. Iti suli, iti nasipnget a paset ti salas, adda pay laeng a nakatugaw ni Remy iti nakakitaanna iti isasangpetna. Nakadumog a nakatapaya dagiti dakulapna iti rupana.

Immanges iti nauneg sa impug-awna ti angin a nabunnong iti kaunggan ti barukongna tapno agtalna ti panagkebbakebbana manen.

“I guess, this is goodbye,” adda tigerger a naibinggas iti nalamuyot a timekna.

Ulimek.

“Ikararagko a sapay ta naragsakkayto ken Ricky...”

Kellaat a naibuang ti anug-og ni Remy. Timmakder. Nalabaga dagiti matana a nalayus iti lua. “I’m really sorry, John. So sorry...” kinuna ni Remy iti baet dagiti sainnekna.

“Don’t be sorry. It’s okay. Maawatanka... maawatak ti inaramidmo.” Natalna ti timekna nupay no adda pait a nairap-ing.

“Saanka a pumanaw. Balaymo daytoy. Siak ti rumbeng a pumanaw.”

“Kayatko ti umadayo iti daytoy a lugar. So, please stay. No ad-adda a maikari ni Ricky kenka ngem iti siak, maawatanka.”

Nagsangit manen ni Remy.

“Goodbye, Remy.” Timmallikuden. Awanen ti kiredna a mangdengdengngeg kadagiti saibbek ti babai. Bitbitna ti maletana a nagna a nagturong iti ridaw.

“John…!” impakamakam ni Remy.

Nagsardeng. Ngem saan a timmaliaw.

“Sakbay a pumanawka, kayatko la a maammuan: inayatnak kadi met laeng?”

Naklaat. Immanges iti nauneg sa intuloyna ti nagna.

Simmaruno ni Remy. “Please, John... You owe me that... Isu laeng ti kayatko a maammuan.” Agsansaninglot manen ni Remy.

Linukatanna ti ridaw. Iti yaaskawna iti ruar ti ridaw, nakapayat iti dakkel a sobre. Napaayas ket dina nabalanse ti bagina. Naigiddan ti panagbusi ti paltog. Napadata. Kas kapardas ti panagrupike ti paltog ti kapardasna met laeng a nagsardeng. Nangngegna ti daranudor ti lugan ken ti panagit-it dagiti goma iti napardas nga yaadayo ti ungor.

Ngem uray no apagkimat laeng ti pannakakitana, nailasinna ti lugan. Nangisit a Navigator. Licence plate: NEVADA 301-VAT.

Timmakder. Pinidutna ti sobre a napayatna. FedEx Overnight Delivery. Naggapu iti MAXI-CLEAN, INC. Isuna ti nakaiturongan ti surat. Kinitana ti aglawlaw. Mangrugin a rummuar dagiti kakaarrubana nga agturong iti balayna.

Nasinga iti nakapuy nga areng-eng a naggapu iti uneg. Timmaliaw. Nagsidduker. Ni Remy, nalayusen iti dara! Timmaray iti nakaudatalan ni Remy. Nakabukilad dagiti matana. Nakaapput ti maysa a dakulapna iti tengedna a paggapgapuan ti agsaysayasay a dara. Nakudrepen dagiti matana. Bimmessag ti rupana.

Inruarna ti Iphone-na. Indayalna ti 911.

“J-John,” nakapuy ti timek ni Remy.

Nagparintumeng. Inuksobna ti tisert sa impandagna iti tengnged ni Remy. Sinaklotna ti ulo daytoy. Nabessagen. Agalla-alla dagiti matana. Timmangad iti blanko a bubongan.

“Diosko,” nayesngawna iti umuna a gundaway sipud pay iti panagbaritona. Uray iti kaaddana iti kangitingitan ti pannakirupakna iti tay-ak ti paggugubatan, iti agngangabit a pannakatayna iti ima dagiti kabusorna, dina man laeng naawagan ti nagan ti Dios. Maymaysa laeng ti nagbalin a diosenna iti tengnga ti paggugubatan. Ti paltogna ken ti panagtalekna kadagiti kakaduana iti squadron-da. “No pudpudnoka, sadino man ti ‘yanmo, maymaysa laeng ti kiddawek kenka... Saanmo a palubosan a sumina ni Remy.”

“J-John...” nakapuyen ti timek ni Remy. “I'm r-really s-sorry for what I did.  I love you...” Limmukayen ti balasang.

Nagsasaruno dagiti makatitileng a sirena dagiti nagsangpet: Fire department, ambulansia, ken polisia. Adda pay ti US Marine Corps Criminal Investigation Division.

Nagsasaruno dagiti paramedics nga immasideg iti ‘yanna.

“Let her go, Sir... We'll takeover...” kamaribusoda a nangkita ken ni Remy.

Binungonda ni Remy iti nangisit a plastik. Binagkatda nga imparabaw iti stretcher sa ginuyodda nga inruar agingga iti lugan ti coroner.

Indawatna ti apagapaman a panagpakadana iti bangkay. Linukatan dagiti paramedics ti plastik sa immadayo da.

Minatmatanna ti nalusiawen a rupa ni Remy. Adu ti naimantsa a dara iti rupa ken tengngedna. Nangemkem.

NALUKAG ni John iti pannakailukat ti ridaw. Simrek ti maysa a natayag a kabambannuaganna a puraw a lalaki.  Iti nagmarantiddog nga insignia iti kuelio daytoy, ammona a warrant officer ti US Marine Corps. Nakaiggem iti folder.

“Good morning, Captain Villa,” inkablaaw ti lalaki.

“Masmasdaawak no ania ti interes ti US Marine iti daytoy a kaso, Mister Thompson,” insungbat ni John. “Napasamak ti krimen iti ruar ti jurisdiction ti US Marine.”

“You're still a Marine, Capt.”

“Honorably discharged, Mister Thompson,” insippaw nga inyatur ni John.

“Not until thirty days from now, Capt. You are on a terminal leave.  Kayatna a sawen, whatever you do, addaka pay laeng iti jurisdiction ti US Marine ken mabalin pay laeng a madusaka under the Uniform Code of Military Justice.”

“Ket ipapanmo nga adda pakainaigak iti napasamak a krimen?”

“Wen. Sika ti mismo a nakasaksi iti krimen.”

“Naibagakon kadakayo ti napasamak. Ania pay ti kayatyo a maammuan?”

“Saanmo a nakita dagiti pimmaltog?”

“Naikaglisak.”

“Adda nakarehistro a paltog iti naganmo, kapitan?”

“Glock .45 caliber.”

“Nasken a makitami.”

“Ta suspetsaak metten?”

“We just want to cover all grounds, Capt.”

“Isukokto kadakayo. Anything else? Adu pay dagiti nasken nga asikasuek.”

Immasideg ti Warrant Officer. Nangyaplag iti folder a naglaon iti retrato.

“Am-ammom dagitoy, Capt?  Kaano ti naudi a kontakmo kadakuada?”

Immulo ti darana apaman a nakitana dagiti ladawan. “Gaddem…” naingayemngemna.

(Padaanan ti tuloyna iti umay a lawas)