SIUDAD TI BAGUIO – Kinuna ni Mayor Benjamin Magalong a silulukat manen ti Baguio iti sektor ti turismo kalpasan a nagpukaw ti siudad iti 3.5-bilion a pisos a mabalin a naganar koma ti siudad itay napan a tawen manipud kadagiti turista.
Mainaig iti daytoy, impalagipna manen kadagiti residente ken kadagiti sangaili ti naiget a panagtungpal iti Minimum Public Health Standards (MPHS) a kas saluad kontra iti agraraira a pandemia a COVID-19.
Kuna ni Magalong a ti kasamayan a wagas a mabalin nga aramiden tapno masalakniban ti bukod a bagi kontra iti COVID-19 ken dagiti variant daytoy ket ti panagtungpal iti MPHS. Kunana pay a kadawyan kadagitoy ket libre wenno no aggastoska man, saan a nangina, kas iti physical distancing ken naynay a panagbuggo kadagiti ima.
Innayon ni Magalong a ti nasao a siudad a maibilang a Summer Capital, luktanna manen ti ekonoma ken industria ti turismo daytoy ta iti agdama, kontrolado metten ti siudad ti kasasaad ti COVID-19.
Ilocos Sur, Umuna a Puesto iti Regional SubayBAYANI Awards
Kuna daytoy a masapul a maluktanen ti ekonomia ta adun kadagiti umilina ti agrigrigat gapu iti kaawan ti pagsapulanda. Dinakamatna nga agtultuloy ti pannakadangran ti industria ti turismo ti siudad ken dagiti kanaig daytoy a negosio gapu iti pandemia iti laksid dagiti agdama a gannuat ti departamento ti turismo ken lokal a gobierno a mangpabiag iti daytoy nga industria ken kadagiti negosio a kanaig daytoy.
Inako pay ni Magalong nga itay napan a tawen, nagpukaw ti industria ti lokal a turismo iti 3.5-bilion a pisos a posible a naganar koma manipud kadagiti kadagiti turista.
Manipud iti tantia a 1.7-milion a simmangpet a turista idi 2019, dinakakamatna a 232,000 a sangaili laeng ti simmangpet iti daytoy a siudad, mamimpito a daras a basbassit ngem iti sinarunona a tawen.
Iti kangitingitan ti pannakaisayangkat ti lockdown iti entero a Luzon wenno manipud iti Abril agingga iti Hunio itay napan a tawen, nasurok a 1.6-bilion a pisos a potensial a naganar ti napukaw ti industria ti lokal a turismo idinto a rinibu a mangmangged kadagiti nadumaduma nga industria a mainaig iti turismo ti nagpukaw iti nasurok a 550-milion a pisos a sueldoda koma.
Nupay kasta, kuna ni Magalong a naikagumaanan ti siudad ti gimmanar iti mapan a 1.8-bilion a pisos manipud kadagiti turista itay napan a tawen, kangatuan kadagiti kangrunaan nga apar dagiti turista iti pagilian kalpasan a nanglukat ti siudad kadagiti turista idi Oktubre itay napan a tawen babaen ti pannakaisayangkat ti “Ridge to Reef” a tourism bubble iti nagbaetan ti Baguio ken ti Rehion ti Ilokos.
Impasingked pay ni Magalong nga awan ti maikompromiso ti salun-at ken kinatalgedna iti daytoy a gannuat ti siudad a manglukat iti ekonomia ken industria ti turismo ta adda latta dagiti maipakat a pagalagadan ken proseso.
(Damag manipud iti Manila Bulletin.)
