Ni BLESSING ANGEL V. AGLIAM
ILOCOS NORTE—Itantandudo dagiti aglaklako iti makan nga adda puestoda iti La Tabacalera Food Park ti pannakaaramat dagiti produkto wenno apit iti Ilocos Norte nga isaganada nga iserbi kadagiti kustomerda tapno matulongan met dagiti dadduma a sektor itoy a panawen ti pandemia.
Linuktan ti Ilocos Norte Trade and Investment Office (INvest) ti La Tabacalera Food Park iti Siudad ti Laoag idi Mayo 28, 2021, kas paset ti panangparegta ti Gobierno Probinsial iti ekonomia ti probinsia. Babaen itoy, naikkan iti puesto a nababa-ti-upana dagiti babassit a negosio a nadangran iti pandemia.
“Maragsakankami ta amin dagiti konsesionariomi ket bukod a pundar dagiti kakailiantayo ken agar-aramatda kadagiti bukodtayo met laeng a produkto nga iserbida. Kas iti ‘Sam’s Sugarcane,’ matultulonganna dagiti lokal nga agmulmula iti unas ken dagiti agar-aramid iti produkto manipud iti unas,” kinuna ni Ms. Rona Leigh Cheng-Bueno, pangulo ti INvest.
Innayonna nga adda pay dagiti adda puestoda a nagala kadagiti agtrabtrabaho nga estudiante (working students) a kas katulonganda iti puestoda.
Ilocos Sur, Umuna a Puesto iti Regional SubayBAYANI Awards
Naikabassit ketdi ita ti maganar dagiti aglaklako iti makan iti food park gapu kadagiti pagannurotan iti salun-at nga ipatpatungpal ti gobierno lokal ti Siudad ti Laoag. Agingga met ita, sangapulo ket maysa pay laeng a negosio ti napalubosan a naikkan iti puesto gapu iti maipakpakat a “social distancing” iti nasao a lugar.
Impanamnama ketdi ni Ms. Bueno nga agtultuloy ti kaadda dagiti puesto iti food park ta maysa kadagiti panggepda ti “mangparnuay iti maysa a lugar a pakaitanduduan ti kinamanagparnuay, linglingay, ken panangapresiar iti bukod a kultura iti laksid ti kaadda ti pandemia.” (Pammadayaw ti PGIN-CMO dagiti naaramat a ladawan)
