SIUDAD TI LAOAG – Mabalinen nga agawid iti Ilocos Norte dagiti residente a napawilan gapu kadagiti restriksion ti quarantine manipud iti daytoy a Septiembre 1.
Iti maysa a pakaammo iti rabii ti Lunes, Agosto 30, kinuna ti turay ti probinsia a mailigsayen ti makabulan a pannakaipawil ti panagawid dagiti napupok nga indibidual kadagiti lugar a yanda ita ken dagiti agawid manipud iti ballasiw-taaw.
Maibatay iti pakaammo, ibalbalakad ti Turay ti Probinsia a makikoordinar dagiti amin nga agawid a residente kadagiti bukodda a turay ti ili wenno lokal a gobierno tapno maurnos ti panagawid dagitoy, kas mayannurot kadagiti maipakpakat a pagalagadan.
Kompleto man wenno saan ti bakuna dagitoy, amin nga agawid a residente, masapul a mangidatagda iti negatibo ti resultana nga RT-PCR (reverse transcription-polymerase chain reaction) a naala iti uneg ti 60 oras apaman a nakaawid.
Ruth Padilla, agngayangay a kas Diputado ti Nueva Vizcaya
Tapno maliklikan ti pannakaitantan ti panagawid, maibalakad iti residente a dumawat iti acceptance letter manipud iti mayor ken iti resident admittance a maala iti border.
Nupay saanen a masapul ti inkapilitan a home quarantine, magutigot ketdi latta ti agawid a residente a limitaran daytoy ti panagruarna wenno nasaysayaat pay nga agtalinaed iti pagtaenganna iti saan a nabibiit ngem makalawas.
Iti sabali a bangir, pinagtalinaed ni Gobernardor ti Ilocos Norte Matthew Manotoc ti enhanced community quarantine nga istatus ti 19 nga ili agingga iti Septiembre 7.
Nailanad iti Executive Order No. 151-21 a naipaulog iti Lunes nga amin a siudad ken ili ti Ilocos Norte, malaksid ti Adams, Carasi, Dumalneg, ken Pagudpud, agtalinaed iti kaigetan a lockdown tapno makontrol ti ad-adda pay a panagwaras ti coronavirus disease 2019 (COVID-19).
(Damag manipud iti Philippine News Agency ken Manila Bulletin.)
